” အိပ်စက်ခြင်းကို ကူညီပေးမယ့် Melatonin ဟော်မုန်းအကြောင်း “
မယ်လတိုနင် (Melatonin) ဆိုတာ…
မယ်လတိုနင် (Melatonin) ဆိုတာ ဦးနှောက်ရဲ့အလယ်ပိုင်းမှာရှိတဲ့ ဂလင်းတစ်ခုကနေ ဘဘာဝအတိုင်းထုတ်ပေးနိုင်ပြီး အိပ်ပျော်စေတဲ့ ဟော်မုန်းတစ်မျိုး ဖြစ်ပါတယ်။ မယ်လတိုနင်ဟာ လူတစ်ယောက်ကို အိပ်စက်ချိန်နဲ့ နိုးထချိန်မှန်အောင်လုပ်ပေးတဲ့ ဟော်မုန်းလို့ ပြောရင်လည်း မမှားပါဘူး။ နေဝင်လေလေ လူ့ခန္တာကိုယ်ထဲမှာ မယ်လတိုနင် ဟော်မုန်း ထုတ်လုပ်တာ များလေလေဖြစ်ပြီး ညနက်လာရင် ဟော်မုန်းပမာဏ အများဆုံးကိုရောက်သွားပါတယ်။ ပြီးရင်တော့ တဖြည်းဖြည်း ပြန်ကျသွားပြီး မနက်နေထွက်လာတာ နဲ့ ဟော်မုန်းဓာတ်တွေ ကုန်ခမ်းသွားပါတယ်။ မယ်လတိုနင်ကို ခန္ဓာကိုယ်က အလိုအလျောက်ထုတ်ပေးနိုင်သလို ဖြည့်စွက်ဆေးအနေနဲ့လည်း မှီဝဲနိုင်ပါတယ်။
.
.
မယ်လတိုနင် (Melatonin) ဖြည့်စွက်ဆေးကို သောက်သုံးလို့ရတဲ့သူတွေက….
* အထူးသဖြင့် ညဘက်အိပ်မပျော်တဲ့သူတွေနဲ့ အိပ်စက်ခြင်းဆိုင်ရာရောဂါရှိတဲ့သူတွေဟာ မယ်လတိုနင် (Melatonin) ဆေးကို မှီဝဲကြရပါတယ်။
* ညဘက်အလုပ်ဆင်းရသူတွေ၊ နိုင်ငံမတူလို့ အချိန်(time zone) မတူတဲ့နေရာဒေသများကို သွားလေ့ရှိသူတွေနဲ့ အိပ်ရာဝင်ချိန်မမှန်သူတွေဟာလည်း Melatonin ဆေးကို သောက်သုံးနိုင်ပါတယ်။
* အိပ်ရင်ဟောက်တတ်သူတွေနဲ့ ညဘက်အိပ်မပျော်တာ အတော်ကြာပြီဖြစ်တဲ့သူတွေကတော့ ဆရာဝန်နဲ့ဆွေးနွေးပြီးမှသာ သောက်သုံးသင့်ပါတယ်။
* မယ်လတိုနင်နဲ့ ဓာတ်မတည့်ဖူးတဲ့ သူတွေ၊ ကျောက်ကပ် ၊ အသည်းရောဂါရှိတဲ့သူတွေနဲ့ ခုခံအားဆိုင်ရာရောဂါ ( Autoimmune condition) တွေရှိတဲ့ သူတွေအနေနဲ့ မယ်လတိုနင် သောက်ရတော့မယ်ဆိုရင် ရောဂါတွေအကြောင်း ဆရာဝန်ကို ကြိုပြောပြဖို့လိုပါတယ်။
.
.
မယ်လတိုနင် (Melatonin) ရဲ့ ဂုဏ်သတ္တိတွေက….
မယ်လတိုနင် (Melatonin) ဟာ အိပ်ဆေးမဟုတ်ဘဲ ဖြည့်စွက်ဟော်မုန်းသာဖြစ်ပါတယ်။ အိပ်ချိန်မမှန်တဲ့သူတွေမှာ အိပ်ချိန်မှန်လာစေပြီး အိပ်ရေးပြည့်ဝစေပါတယ်။ ညဘက်အိပ်မပျော်တဲ့သူတွေမှာလည်း ပိုပြီးနှစ်နှစ်ခြိုက်ခြိုက်အိပ်ပျော်လာစေပါတယ်။ အယ်လ်ဇိုင်းမားရောဂါ (သို့မဟုတ်) ကင်ဆာရောဂါ ရှိတဲ့သူတွေ ၊ ညဘက်သွေးပေါင်တက်တတ်တဲ့သူတွေနဲ့ အိပ်ချိန်မမှန်တဲ့ ကလေးငယ်တွေမှာလည်း Melatonin ကို စမ်းသပ်သုံးစွဲကြပါတယ်။
.
.
မယ်လတိုနင် ( Melatonin) ရဲ့ ဘေးထွက်ဆိုးကျိုးတွေက…
Melatonin ဟာ တခြားအိပ်ဆေးတွေနဲ့ယှဉ်ရင် ဘေးထွက်ဆိုးကျိုး အလွန်နည်းပါတယ်။ အဖြစ်များတဲ့ဘေးထွက်ဆိုးကျိုးတွေကတော့
* မနက်ပိုင်းနဲ့ နေ့လည်ပိုင်းတွင် အိပ်ငိုက်ခြင်း
* ခေါင်းကိုက်ခြင်း
* မူးဝေခြင်း
* ဗိုက်အောင့်ခြင်း
* စိတ်ဖိစီးခြင်း
* လေးလံထိုင်းမှိုင်းခြင်း
* စိတ်ကျလွယ်ခြင်း … တို့ ဖြစ်တတ်ပါတယ်။
…
…
Melatonin ဆေးနဲ့ တွဲမသောက်သင့်တဲ့ဆေးတွေက…
* သွေးကျဲဆေး
* ကိုယ်ခံအားကျစေသောဆေး
* ဆီးချိုဆေး
* သန္ဓေတားဆေး စတာတွေနဲ့ တွဲသောက်တဲ့အခါ ဆေးရဲ့အာနိသင်ကို လျော့စေနိုင်တာမို့ ဆရာဝန်နဲ့သေချာတိုင်ပင်သင့်ပါတယ်။
Melatonin ဆေးမသောက်ခင် စွဲသောက်နေရတဲ့ဆေးတွေနဲ့ ရောဂါလက္ခဏာတွေကို ဆရာဝန်နဲ့တိုင်ပင်ဆွေးနွေးပြီး ဆရာဝန်ညွှန်ကြားတဲ့အတိုင်း သင့်တော်တဲ့ပမာဏကို သောက်သုံးခြင်းဟာ အကောင်းဆုံးပါပဲ။
Reference: 
https://www.nhs.uk/medicines/melatonin/
https://www.webmd.com/sleep-disorders/what-is-melatonin
NUG, MOH တယ်လီကျန်းမာ ၊ လူတိုင်းအတွက်ပါ
တယ်လီကျန်းမာတွင် ဆရာဝန်များနှင့် အွန်လိုင်းမှ အခမဲ့တိုင်ပင်ဆွေးနွေးနိုင်ပါသည်
*** ပိတ်ရက်မရှိပါ ***
ကြိုတင်ဘိုကင်ယူရန်အတွက်( https://m.me/telehealthmm )ကို နှိပ်ပါ
( နေ့စဥ် မနက် ၈နာရီမှ ည၁၀နာရီအထိ )
#nugmoh#telehealth#telemedicine
#teleconsultation#တယ်လီကျန်းမာ
Ministry of Health,
National Unity Government.
Published on: 3 January 2023
Last Updated: 3 January 2023