မြင်းခွာပုံ ကျောက်ကပ် ( Horse shoe kidney )
ကျောက်ကပ်၏အလုပ်?
ကျောက်ကပ်သည် သွေးအတွင်းရှိ စွန့်ပစ်ရမည့်ပစ္စည်းများကို စွန့်ပစ် ၊ ပြန်စုပ်ယူရမည်တို့ကို ပြန်စုပ်ပေးပါသည်။ ခန္တာကိုယ်အတွက် အရေးပါသော ဓာတ်များကို ထိန်းညှိပေးပါသည်။ ခန္တာကိုယ်အတွက် မလိုအပ်တော့သည့်ရေနှင့်အညစ်အကြေးတို့ကို ဖယ်ရှားသန့်စင်ပေးပါသည်။
မြင်းခွာပုံကျောက်ကပ်ဆိုတာ ဘာလဲ?
မြင်းခွာပုံကျောက်ကပ်ဆိုသည်မှာ မွေးရာပါရောဂါတစ်မျိုး ဖြစ်ပါသည်။ ကလေးငယ်သည် ကျောက်ကပ် ၂ လုံးသပ်သပ်စီပါရမည့်အစား ထို ၂ လုံးမှာ ဆက်နေပြီး မြင်းခွာပုံသဏ္ဏန်ရှိနေခြင်း ဖြစ်သည်။ ကျောက်ကပ်၏တည်နေရာသည် ခါးဘေးတစ်ဖက်တစ်ချက် ခန္တာကိုယ် အနောက်ပိုင်းတွင် တည်ရှိပါသည်။ မြင်းခွာပုံကျောက်ကပ်သည် ထိုနေရာတွင် မဟုတ်တော့ဘဲ တင်ပဆုံကွင်းအတွင်း ခန္တာကိုယ်အရှေ့ဘက်ပိုင်းတွင် ဖြစ်တည်ပါသည်။
ထိုရောဂါ ဘယ်လောက်အဖြစ်များတတ်သလဲ?
အယောက် ၅၀၀ တွင် တစ်ယောက်သော ကလေးသည် မြင်းခွာပုံကျောက်ကပ်ဖြင့် မွေးဖွားလာနိုင်ချေရှိပါသည်။ ယောကျ်ားလေးများတွင် ပိုဖြစ်တတ်ပါသည်။
အခြားရောဂါများနှင့် ဆက်စပ်တတ်ပါသလား?
အချို့သောမွေးရာပါရောဂါများ၊ မွေးရာပါချို့ယွင်းချက်များနှင့် ဆက်စပ်ဖြစ်တတ်ပါသည်။ ဥပမာ – Down syndrome, Turner syndrome
ဘာကြောင့်ဖြစ်တတ်သလဲ?
ထိုကျောက်ကပ်ပုံမှန်မဟုတ်မှုသည် ကလေးမမွေးဖွားမီကပင် ဖြစ်ပါသည်။ အမေသောက်သုံးသော အချို့သောဆေးများ၊ အရက် စသည်တို့နှင့် ဆက်နွှယ်မှုရှိတတ်သည် ဆိုကြပါသည်။
မြင်းခွာပုံကျောက်ကပ်သည် ဘာဒုက္ခပေးတတ်ပါသလဲ?
မြင်းခွာပုံကျောက်ကပ်ရှိသည့်သူတိုင်း လက္ခဏာ မပြကြပါ။ သို့သော် ၎င်းကြောင့် ဆီးလမ်းကြောင်းပိုးဝင်ခြင်း ပြဿနာများ ရှိတတ်ပါသည်။
ဘာလက္ခဏာတွေ တွေ့ရတတ်ပါသလဲ?
မြင်းခွာပုံကျောက်ကပ်ရှိသူများ၏ ၃ ပုံ ၂ ပုံမှာ ကျောက်ကပ်နှင့်ဆိုင်သော လက္ခဏာများ တွေ့ရတတ်ပါသည်။
(၁) ဗိုက်အောင့်ခြင်း
(၂) ပျို့ခြင်း
(၃) ဆီးပိုးမကြာခဏ ဝင်တတ်ခြင်း
(ဆီးသွားလျှင် နာခြင်း၊ ကျဥ်ခြင်း၊ ပူခြင်းအပြင် အဖျားတက်ခြင်း ဖြစ်တတ်ပါသည်)
(၄) ကျောက်ကပ်ကျောက်တည်ခြင်း
(ကျောက်ကပ်ထဲတွင် ကျောက်တည်လျှင် ဗိုက်အောင့်ခြင်း၊ ဆီးတွင်းသွေးပါခြင်းနှင့် ဆီးသွားလျှင် နာခြင်းတို့ ဖြစ်တတ်ပါသည်)
မြင်းခွာပုံကျောက်ကပ်ရဲ့နောက်ဆက်တွဲပြဿနာတွေက ဘာတွေလဲ?
• ဆီးအိမ်နှင့် ဆီးပြွန်ထဲမှ ဆီးများ ကျောက်ကပ်ထဲ ပြန်လျှံခြင်း
• ကျောက်ကပ်အရည်တည်၍ပွခြင်း
• အရည်အိတ်များစွာ ဖြစ်ပေါ်ခြင်း
• ကျောက်ကပ်ကြောင့်ဖြစ်သော သွေးတိုးရောဂါ
• ကလေးများတွင် ဖြစ်တတ်သော ကျောက်ကပ်အကျိတ်
• ကျောက်ကပ်ကင်ဆာ
ကျောက်ကပ်ကင်ဆာရောဂါမှာ အဖြစ်နည်းရှားပါးသော်လည်း မြင်းခွာပုံကျောက်ကပ်ရှိသူများသည် ပုံမှန်လူများထက် ဖြစ်နိုင်ခြေများတတ်ပါသည်။ သို့ဖြစ်ရာ ထိုသူများတွင် ဆီးသွေးပါခြင်း၊ ဗိုက်တွင် အလုံးစမ်းမိခြင်းနှင့် ခါးဘေးဘက်များနာခြင်းတို့ဖြစ်လျှင် သတိထားရန် လိုအပ်ပါသည်။ ကျန်းမာရေးဝန်ထမ်းများနှင့် ဆွေးနွေးသင့်ပါသည်။
မြင်းခွာပုံကျောက်ကပ်ကို မည်သို့ရောဂါရှာဖွေနိုင်သနည်း?
ကျန်းမာရေးဝန်ထမ်းများနှင့် တိုင်ပင်ပြီး ဆီးစစ်ခြင်း၊ ကျောက်ကပ်အလုပ်လုပ်နှုန်းထားစစ်ဆေးခြင်း၊ အာထရာဆောင်းရိုက်ခြင်း တို့ဖြင့် သိနိုင်ပါသည်။
မည်သို့ကုသရမည်နည်း?
လက္ခဏာတစုံတရာ မရှိသေးလျှင် ကုသရန် မလိုအပ်သေးပါ။
လက္ခဏာရှိပါလျှင် သက်ဆိုင်ရာ ဆရာဝန်ထံ ပြသ၍ ကုသမှု ခံယူရပါမည်။
ဥပမာ – ဆီးပိုးဝင်ခြင်းအတွက် ပိုးသတ်ဆေးပေးခြင်း ၊ ကျောက်တည်ခြင်းနှင့် ဆီးလျှံခြင်းတို့အတွက် ခွဲစိတ်ကုသမှုပြုလုပ်ခြင်း
ထိုရောဂါသည် ကာကွယ်၍ ရပါသလား?
မြင်းခွာပုံကျောက်ကပ်ရောဂါသည် ကာကွယ်၍ မရပါ။
သို့သော် ၎င်းရောဂါကြောင့် ဆိုးရွားသော နောက်ဆက်တွဲရောဂါကြီးများ ဖြစ်ခဲပါသဖြင့် မိမိကလေး ထိုရောဂါဖြင့် မွေးဖွားလာခဲ့လျှင် အလွန်အမင်း စိတိမပူပါနှင့်။ ပုံမှန်လူကောင်းတစ်ယောက်ကဲ့သို့ ရှင်သန်နေထိုင်နိုင်ပါသည်။
သတိထားရမည်မှာ မြင်းခွာပုံကျောက်ကပ်ရှိသူများတွင် ကျောက်ကပ်သည် ခန္တာကိုယ်အရှေ့ဘက်ပိုင်းတွင် တည်နေသဖြင့် ဗိုက်ကို မထိခိုက်မိအောင် ဂရုစိုက်ရပါမည်။ အထက်တွင် ပြောခဲ့သော ရောဂါလက္ခဏာများ ဖြစ်ပေါ်လာပါလျှင် နီးစပ်ရာ ကျန်းမာရေးဝန်ထမ်းများနှင့် တိုင်ပင်ဆွေးနွေးရမည် ဖြစ်ပါသည်။
Reference ????
https://my.clevelandclinic.org/…/21745-horseshoe-kidney…
❤️ NUG, MOH တယ်လီကျန်းမာ၊ လူတိုင်းအတွက်ပါ ❤️
???? တယ်လီကျန်းမာတွင် ဆရာဝန်များနှင့် အွန်လိုင်းမှ အခမဲ့တိုင်ပင်ဆွေးနွေးနိုင်ပါသည်
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ
(နေ့စဥ် မနက် ၈ နာရီမှ ည ၁၀ နာရီအထိ)
Ministry of Health,
National Unity Government.
