လူတစ်ယောက်ရဲ့ Personality ဆိုတာကတော့ သူ့ရဲ့အတွေးအမြင်၊ အပြုအမူ၊ စိတ်ခံစားချက်၊ စရိုက်လက္ခဏာပုံစံ စတာတွေကို ဆိုလိုတာဖြစ်ပါတယ်။
လူအမျိုးမျိုး စိတ်အထွေထွေသလို တစ်ယောက်နဲ့တစ်ယောက် personality traits တွေလည်း မတူနိုင်ပါဘူး။
ဒီလို မတူညီမှုတွေကြောင့်ပဲ လူမှုအသိုက်အဝန်းမှာ ဆက်ဆံကြတဲ့အခါ သဘောထားမတိုက်ဆိုင်တာတွေ၊ နားလည်မှုလွဲတာတွေ၊ ညှိနှိုင်းလို့မရတာတွေ၊ ပွတ်တိုက်မှုတွေ ရှိလာတတ်ကြတာပေါ့။
- ကိစ္စတစ်ရပ်အပေါ်မှာ ယူဆပုံချင်း၊ တွေးမြင်ပုံချင်း၊ ကောက်ချက်ချပုံချင်း မတူကွဲပြားတဲ့အခါ ..
- လုပ်ငန်းခွင်မှာ ဆက်ဆံရေးတွေမပြေလည်လို့ ဒီပတ်ဝန်းကျင်မှာ မပျော်မွေ့တော့တဲ့အခါ..
- မိသားစုအိမ်တွင်းရေးမှာ ကတောက်ကဆတွေနဲ့ ညှိနှိုင်းဖို့ခက်ကြတဲ့အခါ ..
- သမီးရည်းစား ချစ်သူဇနီးမောင်နှံတွေကြား သဘောထားမတိုက်ဆိုင်မှုတွေနဲ့အတူ တဖြည်းဖြည်းအက်ကွဲကြောင်းတွေထပ်လာတဲ့အခါ ….
လူတွေမှာ ဘယ်လို Personality ဉာဥ်မျိုးတွေရှိတတ်လဲ၊ ကိုယ်ကရော ဘယ်အမျိုးအစားထဲမှာ ပါနေလဲဆိုတာ အကြမ်းဖျင်းနားလည်ထားရင် အပေါ်မှာပြောခဲ့တဲ့ မပြေလည်ခြင်းတွေကို အတိုင်းအတာတစ်ခုအထိ ဖြေရှင်းနိုင်မှာပဲဖြစ်ပါတယ်။
…
…
OCEAN model အရ Personality traits ၅ မျိုးရှိပါတယ်။
Traits တိုင်းမှာ အားသာချက် အားနည်းချက်ရှိတာမို့ မှတ်ရလွယ်အောင် အတိုချုံးလေးပဲ ပြောပါ့မယ်။
၁။ Openess
အတွေ့အကြုံသစ်တွေကို လိုလားတယ်၊ ပွင့်ပွင့်လင်းလင်းနဲ့ အမြဲဆန်းသစ်တီထွင်ချင်တယ်၊ စူးစမ်းလိုစိတ်လည်း ရှိတဲ့သူမျိုးပါ။
ဒါကြောင့်လည်း စိတ်ကူးယဉ်ဆန်လွန်းပြီး လက်တွေ့မကျတဲ့ အတွေးအခေါ်တွေရှိတတ်ပါတယ်။
.
၂။ Conscientiousness
တာဝန်သိစိတ်လို့လည်း အလွယ်ခေါ်ကြတယ်။ စည်းကမ်းရှိတယ်၊ စီမံခန့်ခွဲနိုင်တယ်၊ ဘယ်အရာမဆို တိတိကျကျနဲ့ အသေးစိတ်လုပ်ရတာမျိုးကိုကြိုက်တယ်။
စည်းကမ်းတင်းကျပ်လွန်းတဲ့အတွက် လိုအပ်တာထက် စိတ်ဖိစီးမှုများတာ၊ အခြားသူများနဲ့ လိုက်လျောညီထွေမဖြစ်တာမျိုးတွေ ရှိနိုင်ပါတယ်။
.
၃။ Extraversion
အပေါင်းအသင်းကို ခုံမင်တယ်၊ အပြင်ထွက်ရတာကြိုက်တယ်၊ အမြဲတက်ကြွနေတတ်တယ်၊ social ကောင်းတယ်ပေါ့လေ။
ဒါပေမယ့် မိမိတစ်ကိုယ်တည်းနေထိုင်ဖို့ Me time လေးထားဖို့ကိုတော့ မေ့နေတတ်ကြပါတယ်။
.
၄။ Agreeableness
Yes man လေးတွေပေါ့။ ဘာပြောပြော သဘောတူလက်ခံကြတာများတယ်။ သဘောကောင်းတယ်၊ အများရဲ့ အကောင်းမြင်တာကို ခံချင်တတ်ကြတယ်။
ဒါကြောင့်ပဲ ကိုယ့်ကိုယ်ကိုယ်တော့ လစ်လျူရှုမိနေတတ်ကြပါတယ်။
.
၅။ Neuroticism
မကောင်းမြင်စိတ်နဲ့အတူ အတွေးတွေလည်း များနေတတ်တယ်။ စိတ်ဖိစီးလွယ်ပြီး ထိလွယ်ရှလွယ်ရှိတတ်သူတွေပါပဲ။ Negative ဆန်တဲ့ အတွေးတွေကြောင့် အမြဲစိတ်ပင်ပန်းရလေ့ရှိပါတယ်။ ပိုဆိုးလာရင် စိတ်ဓာတ်ကျတဲ့အဆင့်ထိပါ ရောက်သွားတတ်သူတွေပါ။
…
….
တစ်ခုရှိတာက ဘယ်လို personality type ကတော့ အကောင်းဆုံး၊ ဘယ်ဟာကတော့ အဆိုးဆုံးဆိုပြီး မရှိပါ။
အမျိုးအစားတစ်ခုချင်းစီမှာ အားသာချက် အားနည်းချက်တွေ ရှိကြတာပဲဖြစ်တဲ့အတွက် …
(ဥပမာ – Neuroticism မြင့်သူတွေဆိုရင် ကိုယ့်ရဲ့စိတ်ဖိစီးမှုကို ဘယ်လိုကိုင်တွယ်ရမလဲဆိုတဲ့ နည်းလမ်းတွေကို လေ့လာနိုင်တာမျိုး)
ဒါတွေကို အကြမ်းဖျင်းနားလည်ထားရင်
- ကိုယ်က ဘယ်အမျိုးအစားထဲမှာ ပါနေလဲ ..
- ဘာတွေကိုတော့ လျှော့သင့်ပြီး ဘယ်အရာတွေကိုတော့ လေ့ကျင့်ပျိုးထောင်သင့်လဲ စတာတွေကို ချိန်ဆနိုင်လာမှာပဲဖြစ်ပါတယ်။
ဒါမှသာလျှင်
ကျွန်မတို့ဘဝနဲ့ လုပ်ငန်းခွင်မှာ..
လူမှုဆက်ဆံရေးတွေမှာ..
Relationship တွေမှာ ..
ဟန်ချက်ညီညီနဲ့ ကောင်းမွန်စွာရှေ့ဆက်နိုင်မှာ ဖြစ်ပါတယ်ရှင်….။
သင်၏စိတ်ကလေး ကျန်းမာစေဖို့
ဒေါက်တာမီ
(စိတ်ပညာလေ့လာလိုက်စားသူ ဆရာဝန်တစ်ဦး )
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
