ခုတော်လှန်ရေးကာလ မြေပြင်ရှေ့တန်းဆေးရုံမှာ ကျွန်တော် Reducible indirect inguinal hernia အမျိုးသားအူကျရောဂါတွေ အများကြီးခွဲခဲ့ရတယ်။ ရောဂါရာဇဝင်မေးကြည့်တယ်။ ဖြစ်နေတာဘယ်လောက်ကြာပြီလဲဆိုတော့ ငါးနှစ်နဲ့အထက်တွေချည်းပဲ။ တော်လှန်ရေးမတိုင်ခင်ကာလကတည်းက ဖြစ်နေကြတာ။
ဘာလို့ခုမှ လာခွဲကြသလဲ ဆန်းစစ်ကြည့်တော့ ငယ်ငယ်က ဖတ်ဖူးခဲ့တာလေး သွားသတိရတယ်။ မြန်မာပြည်မှာ လူနာလည်းမရှားဘူး။ ဆရာဝန်လည်း မရှားဘူးတဲ့။ ဘာကရှားနေတာလဲဆိုတော့ ဆရာဝန်နဲ့ လူနာတွေ့ဖို့ အခွင့်အရေးပါတဲ့။ အကြောင်းရင်းတွေက စီးပွားရေး၊ လူမှုရေး၊ ကျန်းမာရေးအသိ၊ လမ်းပန်းဆက်သွယ်ရေး၊ နိုင်ငံရေး၊ ဆေးရုံအဆင့်နဲ့ လွှမ်းခြုံမှုပေးရမယ့် လူဦးရေမညီမျှမှု စတာတွေလို့ ထင်မိတယ်။
စစ်ရေးအမြင်ကြီးနဲ့ ခရိုင်မြို့ပေးပစ်လိုက်တယ်။ နောက်ကလိုက်ရပြီပေါ့ ခရိုင်အထူးကုဆေးရုံကြီး။ ဆရာဝန် ၂၀ ကျော် အဲဒီနေရာမှာ ပိတ်မိနေရော။ လွှမ်းခြုံတဲ့လူဦးရေက နည်းနည်းလေး။ တချို့မြို့နယ်ဆေးရုံတွေမှာ မြို့နယ်ဆရာဝန် ၁ ယောက်၊ လက်ထောက်ဆရာဝန် ၂ ယောက်နဲ့လွှမ်းခြုံမှုပေးထားတဲ့ လူဦးရေထက်တောင် နည်းနေသေးတယ်။ ဆရာဝန်အယောက်နှစ်ဆယ်က လူနာနည်းနည်းလေးနဲ့ဆိုတော့ အလုပ်ကမရှိ။ ဆရာဝန်သုံးယောက်မှာတော့ လူအများကြီးကို ကုသရေးရော၊ ပြည်သူ့ကျန်းမာကာကွယ်ရေးရော မနိုင်မနင်းဝန်တွေပိ။
နောက်ကျန်းမာရေးကုသရေးကို နိုင်ငံတော်ပြည်သူ့ဆေးရုံအပိုင်းအပြင် ပုဂ္ဂလိကဆေးရုံအပိုင်းပါ ခွင့်ပြုထားပြန်ရော။ အဲဒီနှစ်ခုမှာ လုပ်ခလစာပိုင်းကလည်း ကွာဟချက် အလွန်ကိုကြီးမားပါတယ်။ ဘယ်လောက်ကြီးသလဲဆိုတော့ နိုင်ငံတော်ပြည်သူ့ဆေးရုံကပေးတဲ့ လုပ်ခလစာသည် ဘဝရပ်တည်ဖို့ ဘယ်လိုမှ မလောက်ပါဘူး။ ဒါကတော့ ဌာနတိုင်းပဲဆိုတော့ အထူးပြောစရာလိုမယ်မထင်ပါဘူး။ အားလုံးသဘောပေါက်ကြမှာပါ။ ကိုယ့်ဌာနအလိုက် ကိုယ့်နည်းနဲ့ကိုယ် ဖြေရှင်းဖြတ်ကျော်ခဲ့ကြတာပဲလေ။
ကျွန်တော်တို့ဆေးရုံတွေ ဖြတ်သန်းပုံကတော့ ဆေးရုံအကြီးအသေးလိုက်ပြီး မတူကွဲပြားတယ်ဗျ။ ဆေးရုံအသေးတွေ ခုတင်ငါးဆယ်ဆံ့နဲ့အောက် ဆေးရုံတွေမှာဆိုရင် လူနာတွေကလက်ဆောင်ပေးတဲ့ စာအိတ်လေးတွေနဲ့တင် အဆင်ပြေတယ်ဗျ။ ခရိုင်ဆေးရုံကြီးနဲ့အထက်ကျတော့ အဲဒါမျိုး မရှိတော့ဘူး။ ဆေးရုံကြီးတွေမှာကျ အလုပ်သမားအဆင့်လောက်ပဲ အဆင်ပြေတယ်။ ကျန်တဲ့သူတွေက ဆေးရုံဂျူတီပြင်ပအချိန်ဆို ပုဂ္ဂလိကဆေးရုံမှာ။ ပြည်သူ့ဆေးရုံနဲ့ ပုဂ္ဂလိကဆေးရုံဝန်ထမ်း ဘာကွာလဲဆိုတော့ အလုပ်သမားပဲ ကွာပါတယ်။ ဆရာဝန်၊ ဆရာမကတော့ ဒီလူတွေချည်းပဲ။
ကျွန်တော်ဖြတ်သန်းခဲ့ရတဲ့ တိုက်နယ်ဆေးရုံ၊ မြို့နယ်ဆေးရုံ၊ ခရိုင်ဆေးရုံ၊ သင်ကြားရေးဆေးရုံ တွေက အတွေ့အကြုံကို ပြောပြတာပါ။ နိုင်ငံတော်တခုလုံးရဲ့ ကျန်းမာရေး စောင့်ရှောက်မှုစနစ်ကို ဆန်းစစ်နေခြင်း မဟုတ်ပါဗျ။
…
…
အစကစကား ပြန်ဆက်ရရင် အူကျရောဂါ hernia တစ်ခုခွဲလျှင် သုံးရမည့် ဆေးပစ္စည်းစာရင်းတွေက…
၁။ Clohexadine ဆေးရည်၊ အရက်ပျံ၊ ဘီတာဒင်း ပိုးသတ်ဆေးရည်၊ ဂွမ်းစ၊ ပတ်တီးစများ
၂။ အကြောဆေးသွင်းရန် သွေးပြန်ကြောထဲ ထိုးသွင်းရသော အပ်အပျော့ (cannula)၊ drip set၊ N/S ပုလင်းကြီး လေးပုလင်း၊ စက္ကူပလာစတာ
၃ ။ Antibiotic ပိုးသတ်ဆေးထိုးဆေး၊ ဆေးထိုးရန်တစ်ခါသုံးအပ်နှင့် ဆေးထိုးပြွန်များ
၄။ ခါးရိုးထုံဆေးထိုးရန် သီးသန့်တစ်ခါသုံးအပ်အရှည်၊ တစ်ခါသုံးဆေးထိုးပြွန်များ၊ heavy bupivacaine ထုံဆေး၊ phentanyl ထိုးဆေး၊ ephidrine ထိုးဆေး၊ atropine ထိုးဆေး
၅။ တစ်ခါသုံး၊ ရယ်ဒီမိတ်၊ ပိုးသတ်ပြီး ခွဲစိတ်ခန်းသုံး လက်အိတ်ငါးစုံ၊ cap and mask ခုနှစ်စုံ၊ တစ်ခါသုံး ခွဲစိတ်ဓား တစ်ချောင်း၊ ချုပ်ကြိုး 2/0 chromic cutgut 1, 2/0 nylon 1, some threads, ချုပ်ရိုးအပေါ်မှအုပ်သော အထူးပလာစတာ
၆။ ခွဲပြီးထုံဆေးပြေချိန် အနာသက်သာအောင် ထိုးရသောဆေး၊ သောက်ဆေးများ စသည်တို့ဖြစ်ပါသည်။
တစ်ယောက်ခွဲလျှင် တစ်ခါကုန်သွားသော ဆေးနှင့် ဆေးပစ္စည်းများသာ ဖြစ်ပါသည်။ ပြန်လည်လျှော်ဖွပ်၊ ဆေးကြော၊ ပိုးသတ်ပြီး ပြန်သုံးရသည့် ပစ္စည်းများ မပါသေးပါ။
၄င်းတန်ဖိုးအပေါင်း ဆေးကျောင်းစတက်ချိန်မှတွက်လျှင် အနည်းဆုံးဆယ်နှစ် ငွေအား၊ လုပ်အား၊ လူအား၊ အချိန်အား ရင်းနှီးမြှုပ်နှံထားရသော ဆရာဝန်၊ ဆရာမတို့၏ လုပ်အားခ၊ ပြန်သုံးရမည့် ပစ္စည်းများကို လျှော်ဖွပ်၊ ဆေးကြော၊ ပြန်လည်ပိုးသတ်၊ ဖိနပ်ဆေး၊ ကြမ်းတိုက်၊ လူနာအထုတ်အသွင်းလုပ် စသည့်လုပ်သားများအတွက် လုပ်အားခ၊ ပုဂ္ဂလိကဆေးရုံပိုင်ရှင်၏ အရင်းအနှီးအတွက်အမြတ်၊ ဆေးကုမ္ပဏီများ၏ ဆေးဖိုးပေါ်မှ အမြတ် စသည်တို့ကို လူနာမှ တစ်ပေါင်းတည်းကျခံစေဟု ဆိုလိုက်သောအခါ အခုလို မခွဲရသေးတဲ့ အကြွေးတွေ ပုံလာတာပေါ့။
မြေပြင်ရှေ့တန်းဆေးရုံမှာတော့ အားလုံး အလကားဆိုတော့ လူနာနဲ့ဆရာဝန် တွေ့ဆုံဖို့ အခွင့်အရေး ပိုရလာတာပေါ့။ အလကားရလို့ချည်း မဟုတ်ပါဘူး။ လူနာနဲ့ဆရာဝန် တအားနီးကပ်ပြီး လာလို့လွယ်သွားတာလည်း ပါပါတယ်။ ကျွန်တော်အထက်က တွက်ပြသလောက် အများစုက မတတ်နိုင်ကြပေမယ့် ဆီပုံးကြီးဆွဲလာကြ၊ ဆန်အိတ်ကြီးထမ်းလာကြ အများကြီးပါ။ ကျွန်တော်တို့လည်းစား၊ လူနာနဲ့လူနာစောင့်တွေကိုလည်းကျွေး၊ ဒါတောင်မကုန်လို့ စစ်ဘေးရှောင်တွေတောင် သွားလှူနိုင်ပါသေးတယ်။
ဒါပေမယ့် ဒါကလည်း အရှည်သဖြင့်တော့ မမှန်ဘူးလို့ထင်ပါတယ်။ တော်လှန်ရေးအလွန်ကာလအထိ ဒီလမ်းကြောင်းကြီးကို ဆက်သွားမယ်ဆိုရင် ဆေးဝါးထောက်ပံ့ရမယ့် အစိုးရရော၊ ကျန်းမာရေးဝန်ဆောင်မှုပေးရမယ့် ကျွန်တော်တို့တတွေရော ကြာရှည်တောင့်ခံဖို့ မလွယ်ဘူးထင်တယ်။
ပြည်သူလူထုသို့ ကျွန်တော်တွေးမိသလောက် အတူတူခေါင်းကိုက်ကြရအောင် ဆွေးနွေးတင်ပြခြင်းဖြစ်ပါတယ်ဗျ။ နိုင်ငံရဲ့ကျန်းမာရေးအဆင့်အတန်း မြင့်မားအောင် ပြည်သူလူထုမှလည်း ဝိုင်းဝန်းစဉ်းစားပေးထားကြပါလို့။ အခုကျွန်တော် OG တစ်ယောက်အနေနဲ့ တခြားနိုင်ငံတွေနဲ့ ရင်ဘောင်တန်းနိုင်ဖို့ universal cervical screening program တွေဘာတွေလုပ်ဖို့ စိတ်ကူးယဉ်အိပ်မက် မက်နေရင်းနဲ့ အရင်ကအကြွေးတွေပဲ ဆပ်နေခဲ့ရတယ်။ အိပ်မက်ကတော့ ဆက်မက်နေရမှာပဲလေ။ အလုပ်တွေအားလုံးကတော့ စိတ်ကူးစိတ်သန်းကပဲ စခဲ့ကြရတာ မဟုတ်ပါလားဗျာ…။
ဒေါက်တာဝသုန်
သားဖွားမီးယပ်ဆရာဝန်
လွတ်မြောက်နယ်မြေတစ်နေရာ
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
