စွဲလမ်းမှုလို့ပြောရင် အကောင်အထည်ပြလို့ရတဲ့ လူပုဂ္ဂိုလ်၊ အရာဝတ္တုတွေကို စွဲလမ်းကြတာမျိုး ရှိသလို လက်ဆုပ်လက်ကိုင် ပြလို့မရတဲ့ စိတ္တဇနာမ်တွေအပေါ်လည်း စွဲလမ်းတာမျိုးလည်း ရှိတတ်ကြပါတယ်။
ချစ်ရသူကို စွဲလမ်းမယ်။
အတိတ်တွေကို စွဲလမ်းမယ်။
စိတ်ကို မူးယစ်စေတဲ့အရာတွေကို စွဲလမ်းမယ်။
နာကျင်ရတာကို စွဲလမ်းမယ် စသဖြင့်ပေါ့။
ဒီနေ့အဖို့ကတော့ မျက်စိနဲ့မမြင်ရ၊ ကိုင်တွယ်ထိတွေ့လို့မရတဲ့ အရာတွေအပေါ် စွဲလမ်းခြင်းအကြောင်းကိုပဲ ဆွေးနွေးသွားပါ့မယ်။
…
…
လူအများစုက အတိတ်တွေထဲမှာ ပိတ်မိနေတတ်ကြတာ များပါတယ်။ ကျွန်မကိုယ်တိုင်လည်း အာဏာမသိမ်းခင်က လွတ်လပ်ပျော်ရွှင်ခဲ့ရတဲ့ ဆရာဝန်ဘဝကို ပြန်စဉ်းစားမိ လွမ်းမိနေတုန်းပါပဲ။
တစ်ခါတလေ အတိတ်ကို ပြန်တွေးမိတာဟာ သဘာဝပဲဆိုပေမယ့် ထပ်ခါတလဲလဲ စဉ်းစားမိပြီး ဒီအတိတ်တွေကနေ ရုန်းမထွက်နိုင်တော့ဘူးဆိုရင်တော့ ဒါကို အဖြေရှာပြီး ရှေ့ဆက်နိုင်ဖို့ လိုပါတယ်။
- အတိတ်က ပျော်ရွှင်စရာတွေကို စွဲလမ်းနေတာ
- အတိတ်က နာကျင်ခဲ့ရတာတွေကို မမေ့နိုင်တာ
- အတိတ်က စိတ်ဒဏ်ရာတွေဆီကနေ ရုန်းထွက်မရတာ
- အတိတ်က ကျရှုံးခဲ့တာတွေအပေါ် နောင်တရစိတ်ဖြစ်နေသေးတာ စတဲ့အကြောင်းအရင်းများစွာကြောင့်ပဲ စွဲလမ်းခြင်းကနေ မလွန်မြောက်နိုင်ကြတာပါ။
ဒီအတွက် . . .
ခံစားချက်တွေကို လက်ခံပေးပါ။
ဝမ်းနည်းတာ၊ နောင်တရတာ၊ နာကျင်တာ စတာတွေကို အတင်းအကျပ် မငြင်းဆန်ပါနဲ့။
အတိတ်ဆိုတာ ကိုယ်ဘာမှမတတ်နိုင်တော့တဲ့ ပြီးခဲ့တဲ့ အချိန်ကာလတွေပဲ ဖြစ်တယ်ဆိုတာကိုလည်း နားလည်လက်ခံပေးဖို့လိုပါတယ်။
ပျော်ရွှင်စရာ အသစ်အသစ်တွေကို ဖန်တီးပါ။
အတိတ်ကို ကိုယ်မပြင်နိုင်ပေမယ့် လက်ရှိ မိမိကိုယ်ကိုယ်တော့ ပျော်ရွှင်အောင်ထားပေးလို့ ရပါတယ်။
အတိတ်ကကိုယ်နဲ့ လက်ရှိကိုယ်ကို နှိုင်းယှဉ်တာတွေလျှော့ပါ။ ပစ္စုပ္ပန်မှာပဲ နေပါ။
ကိုယ့်ကိုယ်ကိုယ် ချစ်ပါ။ တန်ဖိုးထားပါ ။
ခံစားချက်တွေကို မျှဝေပါ။ ရင်ဖွင့်ပါ။
မိမိကို အဆိပ်အတောက်ဖြစ်စေတဲ့ ဆက်ဆံရေးတွေကို လွှတ်ချပါ။
ပြောရလွယ်ပြီး လက်တွေ့ခက်ခဲပေမယ့် စွဲလမ်းမှုဟာ ဖြတ်တောက်/လျှော့ချလို့ ရနိုင်သောအရာလည်း ဖြစ်ပါတယ်။
တကယ်လို့ စွဲလမ်းမှုတစ်ခုခုကြောင့် မိမိရဲ့လက်တွေ့ဘဝကို ထိခိုက်စေတဲ့ စိတ်ပိုင်းဆိုင်ရာခံစားမှုတွေနဲ့ အကျိုးသက်ရောက်မှုတွေ ရှိလာပြီဆိုရင်တော့
✔ မိမိက ဘာကြောင့် ဘာကို စွဲလမ်းနေတာလဲဆိုတာကို သိအောင်အဖြေရှာပါ။
✔ မေ့မရတဲ့ အတိတ်တွေကို လက်ရှိအချိန်ကကောင်းသောအရာတွေနဲ့ ဖြည်းဖြည်းချင်း အစားထိုးဖို့ ကြိုးစားပါ။
✔️ လိုအပ်ပါက စိတ်ပိုင်းဆိုင်ရာ ကျွမ်းကျင်ပညာရှင်များရဲ့ အကူအညီကို ရယူပါ။
✔ နောက်ဆုံးပိတ် အရေးကြီးဆုံးကတော့ မိမိကိုယ်တိုင်က စတင်ပြောင်းလဲလိုစိတ် ရှိနေဖို့ပါပဲ ဖြစ်ပါတယ်။
အခက်အခဲများအားလုံး ကျော်လွှားနိုင်ကြပါစေ…။
သင်၏စိတ်ကလေးကျန်းမာစေဖို့
ဒေါက်တာမီ
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
