(နေရာလွဲမှား သန္ဓေတည်ခြင်းဆောင်းပါး၏အဆက်…)
အခု အခြေခံကျန်းမာရေးဝန်ထမ်းများအတွက် ဆက်ပြောပြပါဦးမယ်။
ပုံမှန်သန္ဓေတည်ရမည့်နေရာ သားအိမ်အတွင်း တည်တဲ့ကိုယ်ဝန်များလည်း ပျက်ကျတတ်ပါသည်။ miscarriage လို့ခေါ်တယ်နော။ ယေဘူယျသဘော ပြောရရင် miscarriage မှာ သွေးအရင်ဆင်းတယ်။ ပြီးမှ ဆီးစပ်ကနာတယ်။ ဆက်မကြီးထွားတော့တဲ့ ပျက်သွားတဲ့ သားအိမ်ထဲက သန္ဓေသားကနေ သွေးဆင်းတယ်။ ပြီးမှ အကုန်ထွက်ကျသွားအောင် သားအိမ်ကညှစ်ထုတ်တယ်။ ကလေးမွေးသလိုပဲ နာတယ်။ နောက်တော့ သားအိမ်ကညှစ်ချလိုက်၊ နာလိုက်၊ အတုံးအခဲ အသားစလေးတွေ ဆင်းသွားလိုက်၊ ခဏ နာတာသက်သာသွားလိုက် ဒီလိုဖြစ်တာ။ ဒါ့ကြောင့် ရိုးရိုးသားပျက်တာဆိုရင် အစမှာ သွေးအရင်ဆင်း၊ ပြီးမှ သားအိမ်ညှစ်လို့ ဆီးစပ်ကနာတယ် (Bleeding followed by pain) လူနာရဲ့မျက်ခမ်း၊ လျှာ၊ လက်တို့ကိုကြည့်ခန့်မှန်းတဲ့ သွေးအားနည်းတဲ့ anaemia ပမာဏနဲ့ မွေးလမ်းကြောင်းက သွေးဆင်းတဲ့ ပမာဏကလည်း ကိုက်ညီမှုရှိတယ်။ သွေးတွေအများကြီး ဆင်းတာတွေ့ရင် လူနာကဖြူဖျော့သွားမယ်။ သွေးနည်းနည်းပဲဆင်းရင် လူနာလည်းဖြူဖျော့မသွားဘူး။
နေရာလွဲပြီးသန္ဓေတည်တဲ့ tubal pregnancy မှာကျတော့ နာတာကအရင်လာတယ်။ ပြီးမှသွေးဆင်းတယ်။ သားအိမ်က ပူစီဖောင်းနဲ့တူတယ်။ ကိုယ်ဝန်မကပ်သေးသော သားအိမ်သည် လေမှုတ်မသွင်းရသေးသော ပူစီဖောင်းလေး။ သေးသေးလေး။ သစ်တော်သီး အငယ်စားလောက်ပဲ ရှိမယ်။ သားအိမ်ထဲ ကိုယ်ဝန်ကပ်သွားပြီဆိုတာနဲ့ အထဲက သန္ဓေသား ကြီးထွားလာသလောက် သားအိမ်ကလိုက်ကြီးပေးတယ်။ လေထိုးလိုက်တဲ့ ပူစီဖေါင်းလိုပေါ့။ နေ့စေ့လစေ့ရောက်ရင် သားအိမ်က ရင်ခေါင်းအထိရောက်လို့ သောက်ရေအိုးငယ် တစ်လုံးစာလောက်တောင် ရှိသွားတယ်။
သားကြော fallopian tube ကတော့ အဲဒီလိုလိုက်မကြီးပေးနိုင်ဘူး။ Tube ထဲမှာတွယ်တဲ့ သန္ဓေသားလေး တစ်လ၊ တစ်လခွဲသားလောက်ရှိရင်ပဲ tube ထဲမှာမဆန့်ချင်တော့ဘူး။ tube ကတင်းကားလာတယ်။ နာတယ်လို့ခံစားရတယ်။ နာလိုက်၊ ပျောက်လိုက်မဟုတ်ဘူးနော်။ အဆက်မပြတ်နာနေမယ်။ ပြီးမှ မွေးလမ်းကြောင်းက သွေးနည်းနည်း ဆင်းတတ်တယ်။ (Pain followed by bleeding)
လူနာရဲ့ဖြူဖျော့မှု anaemia ပမာဏနဲ့ မွေးလမ်းကြောင်းက သွေးဆင်းမှု ပမာဏနဲ့ကလည်း ကိုက်ညီမှုမရှိဘူး။ မွေးလမ်းကြောင်းက သွေးနည်းနည်းပဲဆင်းပြီး လူနာကကျ တအားဖြူဖျော့နေမယ်။ ဘာကြောင့်လဲဆိုတော့ သွေးတွေက လူနာ့ဗိုက်ထဲကို ထွက်နေတာလေ။
ဒါက အဆိုးဆုံးအခြေအနေဖြစ်တဲ့ tube ထဲက သန္ဓေသားလေးက ဆက်လက်ကြီးထွားပြီး နောက်ဆုံး tube ထဲမှာ ဘယ်လိုမှ မဆံ့တော့တဲ့အတွက် tube ကွဲထွက်သွားပြီး အဲဒီကွဲတဲ့နေရာကနေ ဗိုက်ထဲကိုသွေးတွေထွက်၊ လူနာသွေးပေါင်ကျ shock ရပြီး အရေးပေါ်ဗိုက်ခွဲ၊ သွေးတွေပြန်သွင်း၊ အသက်လုရတဲ့အခြေအနေကို ပြောပြတာပါ။ ကုသမှုနောက်ကျရင် လူနာကို ဆုံးရှုံးရတတ်ပါတယ်။ Ruptured tubal pregnancy, massive intraperitoneal haemorrhage with shock which might lead to death if there’s delayed interventions.
ခုအခါမှာတော့…
၁။ အာထရာဆောင်း Ultrasound (USG) တွေတိုးတက်လာခြင်း၊ ဗိုက်ပေါ်ကရိုက်ရတဲ့ USG (Transabdominal USG) သာမက မိန်းမကိုယ်၊ မွေးလမ်းကြောင်းထဲမှတစ်ဆင့် ရိုက်ကြည့်၍ရသော USG (Transvaginal USG) များ အသုံးပြုလာနိုင်ခြင်း
၂။ သွေးအတွင်း ကိုယ်ဝန်ဟော်မုန်းဓာတ် (serum beta hCG) ပမာဏ အတက်အကျကို ၄၈ နာရီခြားတစ်ခါ အတိအကျ စမ်းသပ်တိုင်းတာလာနိုင်ခြင်း
စသည်တို့ကြောင့် tubal pregnancy များအားလုံးသည် ကွဲထွက်မှု ruptured မဖြစ်ကြပါဟု သိလာပါပြီ။
Ruptured မဖြစ်မီတွင်ပင် tubal pregnancy ဖြစ်နေကြောင်းလည်း သိရှိလာနိုင်ပါပြီ။
ဘယ်လိုသိသလဲဆိုရင်…
TVS မှာ double rings sign (intrauterine gestational sac) ကိုမတွေ့ဘူး။ Uterus is empty. Uterus ရဲ့ဘေးမှာ အလုံးတစ်ခု တွေ့နိုင်တယ်။ Adnexal mass ပေါ့။ POD မှာ free fluid တွေ့နိုင်တယ်။
Serum beta hCG level 48 hrly တိုင်းတာကို doubling time လို့ခေါ်ပါတယ်။ Normal intrauterine ongoing pregnancy ဆိုရင် previous level ၏ 60% and above တက်ပါတယ်။ Graph ဆွဲကြည့်ရင် raising or upwards trend ပေါ့။ Ectopic or Tubal pregnancy မှာတော့ အဲဒီလိုမတက်ဘူး။ Graph မှာ plateau trend သွားတယ်။ Downwards trend သွားနေပြီ ဆိုရင်တော့ failed pregnancy where-ever it is intrauterine or not.
…
…
ယခုသိရှိလာသည်မှာ tubal pregnancy များသည်
၁။ အလိုအလျောက် ပျက်ကျသွားတတ်ပါသည် (Spontaneous tubal abortion)။ ၎င်းအတွက်ထူးရှယ် သေချာပြင်ဆင်ပေးထားသော သားအိမ်အတွင်းနံရံအပေါ်ပိုင်းတွင် တွယ်ကပ်သော ကိုယ်ဝန်သည်ပင် ပျက်ကျတတ်သည် မဟုတ်ပါလား။ အခြေအနေအရ သူ့အတွက်မဟုတ်သော နေရာတွင် တွယ်ကပ်လိုက်ရသော ကိုယ်ဝန်သည် ပျက်ကျနိုင်ခြေ များသည်ပေါ့။
ထို့ကြောင့် tubal pregnancy မှန်းသိလျက်နှင့် အလိုလိုပျက်ကျသည်ကို စောင့်ကြည့်ကုသသော conservative treatment ဟူ၍ရှိပါသည်။ သို့သော်…
ဤသို့သော်က အလွန်အရေးကြီးပါသည်။ Tubal pregnancy များအားလုံးကို conservative treatment ပေး၍ရသည်ဟု မဆိုလိုပါ။ ဤကုသမှုပေးရန် ကိုက်ညီသောအချက်များ ပြည့်စုံသလား ကြည့်ရပါသည်။ ဥပမာ tubal pregnancy ဟုသိသိချင်းအချိန် serum beta hCG ပမာဏသည် ၁၅၀၀ ထက်မကျော်ရ၊ လူနာ၏ သွေးပေါင်ချိန်၊ သွေးခုန်နှုန်းကောင်းရမည်။ လူနာသည် ရက်ချိန်းမှန်မှန် လာပြနိုင်သူဖြစ်ရမည်။ ၄၈ နာရီခြားတစ်ခါ serum beta hCG level တိုင်းနိုင်ရမည်။ level ကျလာရင် conservative treatment အောင်မြင်ဖို့နီးစပ်တယ်လေ။ လိုအပ်ရင် လိုအပ်သလို transvaginal USG ထပ်ခါထပ်ခါရိုက်နိုင်သော အခြေအနေရှိရမည်။ စသည်ဖြင့်ပေါ့ဗျာ။
အဲဒီလောက်ရှင်းပြလိုက်ရင် ကျွန်တော်တွေ့ခဲ့တဲ့ လူနာအများစုကတော့ ခွဲလိုက်ပါတော့ဆရာပဲ ပြောကြတယ်။ သားကြောတစ်ချောင်း ပြတ်သွားမှာနော်ဆိုလည်း မနှမြောကြဘူးဗျ။ မှတ်မှတ်ရရ ကျွန်တော် conservative treatment တစ်ခါတော့ အောင်မြင်ဖူးတယ်။ ကျောက်ဆည်မှာ။ ခုတောထဲမှာတော့ မလုပ်ရဲပါဘူးဗျ။ Serum beta hCG 48 hrly တိုင်းစရာလည်း မရှိဘူး။ ချိန်းတဲ့အတိုင်း လာပြမယ့်လူနာတွေလည်း မဟုတ်ဘူး။ Tubal pregnancy ထင်တာနဲ့ အရေးကြီးတယ် ခွဲရမယ် ဒီလိုပဲ ရှင်းပြနေပါတယ်ဗျ။
.
၂။ နောက်တစ်ခု ruptured မရသေးခင်မှာကို tubal pregnancy မှန်းသိတယ်။ ဒါဆိုရင် medical treatment ပေးလို့ ရနိုင်တတ်တယ်တဲ့။ ဘာပေးတာလဲဆိုတော့ injection: i.m methotrexate 50 mg single dose. သူက ကင်ဆာဆဲလ်တွေကို သေစေတဲ့ဆေး။ လျင်မြန်စွာ ပွားများနေသော ကင်ဆာဆဲလ်များကို သေစေတဲ့ဆေး။ သန္ဓေခဲလေးကလည်း လျင်မြန်စွာပွားများနေသော ဆဲလ်တွေပဲလေ။ သူတို့လည်း methotrexate နဲ့တွေ့ရင် သေမှာပေါ့။
သို့သော်… ဤသို့သော်လည်း အရေးကြီးတာပဲ။ Tubal pregnancy များအားလုံးကို medical treatment ဖြင့်ကုနိုင်သည်ဟု မဆိုလိုပါ။ အထက်ကလိုပဲ လိုအပ်ချက်တွေရှိပါသည်။ ဥပမာ သိသိချင်း serum beta hCG level 3500 ထက်မကျော်ရ။ USG တွင်တွေ့ရသော သားအိမ်ပြင်ပရှိ သန္ဓေခဲအရွယ်အစားသည် 3.5 cm ထက်မကြီးရ။ လူနာ သွေးပေါင်ချိန်၊ သွေးခုန်နှုန်း ကောင်းရမည်။ ရက်ချိန်းမှန်မှန် လာပြနိုင်သူဖြစ်ရမည်။ စသည်ဖြင့်ပေါ့ဗျာ။ အများကြီးပါပဲ။ အမှန်အတိုင်းဝန်ခံရရင် ဒီနည်းနဲ့ ဒီရောဂါကို ကျွန်တော်တစ်ခါမှ မကုဖူးပါဘူးဗျ။
.
၃ ။ နောက်တစ်မျိုးကတော့ နာတာရှည် နေရာလွဲသန္ဓေ chronic ectopic pregnancy ပေါ့။ သူ့အလိုလိုပျက်ကျ၊ ဘာမှမလုပ်လိုက်ရပဲ ပျောက်သွားတဲ့ spontaneous tubal abortion လောက်လည်း ကံမကောင်းဘူး။ Ruptured tubal pregnancy လို ဗိုက်ထဲမှာ သွေးတွေဒလဟောထွက်၊ အရေးပေါ်ဗိုက်ခွဲရ၊ သွေးတွေသွင်း အသက်လုရ၊ နောက်ကျသွားရင် အသက်ဆုံးရှုံး အဲဒီလောက်လည်း ကံမဆိုးဘူး။ Tube ထဲမှာ မဆံ့မပြဲနဲ့ ကွဲထွက်သွားရလောက်အောင်လည်း မကြီးထွားနိုင်ဘူး။ သေသွားပြီး၊ ကြီးထွားမှုရပ်တန့်သွားပြီး ပျက်လည်းကျမသွားဘူး။ သူတို့က ဘယ်လိုလာသလဲဆိုတော့ ဆိုးဆိုးဝါးဝါး သွေးအားနည်းတဲ့ လက္ခဏာတွေနဲ့ လာတတ်တယ်။ ဘယ်လောက်ဖြူဖျော့နေသလဲဆိုရင် စက္ကူလိုဖြူဖွေးနေတာပဲ။ Paper white လို့ တင်စားခေါ်ဝေါ်ကြတယ်။
ရောဂါရာဇဝင် မေးကြည့်ရင် ဗိုက်ထဲကထိုးအောင့်လာလိုက်၊ မူးမိုက်မေ့သွားလိုက်၊ ပြန်သတိလည်လာလိုက် ခဏခဏဖြစ်နေတယ် ပြောကြတယ်။ Tubal pregnancy ကနေ သွေးထွက်လိုက်၊ သွေးပေါင်ကျ မူးမေ့သွားလိုက်၊ နီးစပ်ရာဆေးခန်းမှာ drip ပုလင်းလေးသွင်းလိုက်၊ သွေးပေါင်ပြန်တက်လာ သတိရလာလိုက်၊ tubal pregnancy ကနေသွေးက ဆက်မထွက်ဘဲ အလိုလိုတိတ်သွားလိုက်၊ နောက်တစ်ပတ်ဆယ်ရက်ကြာတော့ အဲဒီလိုပြန်ဖြစ်လိုက်နဲ့ ခဏခဏဖြစ်လာတော့မှ ဆေးရုံရောက်လာရော။ ရောဂါရာဇဝင်လေး နားထောင်ပြီး ကြည့်လိုက်တော့ လူနာကဖြူဖျော့လို့။ ဆီးစစ်ကြည့်တော့ ကိုယ်ဝန်ရှိတယ်လို့ ရေးရေးလေးပေါ်တယ်။ အတော်သေချာနေပါပြီ။ မိန်းမကိုယ်အတွင်းပိုင်း စမ်းသပ်မှု vaginal examination လုပ်ကြည့်လိုက်သေးတယ်။ သားအိမ်ဘေးမှာ အလုံးကြီး စမ်းမိတယ်။ သေချာတယ်။ ဘာ USG မှမရိုက်တော့ဘူး။ chronic ectopic pregnancy ။ သွေးလေးလုံးရှာပါ။ အရေးပေါ် ဗိုက်ခွဲပြီး လိုအပ်သလို ဆက်လုပ်မယ်။ Laparotomy and proceed ပေါ့။
.
၄ ။ နောက်တစ်မျိုးက tubal pregnancy လို့ ruptured မရခင်မှာကို သိတယ်။ Conservative treatment ပေးဖို့ ဘောင်မဝင်ဘူး သို့ လူနာက သဘောမတူဘူး။ Medical treatment ပေးဖို့ ဘောင်မဝင်ဘူး သို့ လူနာက သဘောမတူဘူး။ ခွဲချင်တယ် သို့ ခွဲရမယ်။ အရေးပေါ်လည်း မဟုတ်ဘူး။ အဲဒါဆို ပစ္စည်း၊ ပညာ၊ လူအင်အား ပြည့်စုံမှုရှိရင် laparoscopic surgery ဆိုတာ လုပ်လို့ရသေးတယ်။ ဗိုက်မှာ အပေါက်သေးသေးလေး သုံးပေါက်ဖေါက်လိုက်တယ်။ တစ်ပေါက်ကနေ ကင်မရာပါတဲ့ မှန်ပြောင်းထည့်၊ TV နဲ့ဆက်ထားတယ်။ TV monitor ပေါ်မှာ ဗိုက်ထဲကမြင်ကွင်းကို ရှင်းရှင်းကြီး မြင်နေရတယ်။ ဘေးနှစ်ပေါက်ကနေ ညှပ်တွေ၊ ကပ်ကျေးတွေထည့်၊ မျက်စေ့က monitor ကိုကြည့်နေပြီး လက်ကခွဲရတာ။ Video game ဆော့တာနဲ့ တူတာပေါ့။ အဆင့်မြင့်နည်းပညာပေါ့ဗျာ။ ဒီပညာကိုသင်ယူဖို့ ကျွန်တော် အခွင့်အရေး မရခဲ့ဘူး။ သူက ခွဲစိတ်အပြီးနာကျင်မှု ပိုသက်သာတယ်။ နာလန်ထမြန်တယ်။ အမာရွတ်မကျန်ဘူး။ ပိုကောင်းတယ်ပေါ့ဗျာ။ ကျွန်တော်ကတော့ ဒီနည်းနဲ့မခွဲတတ်ပါဘူးဗျ။
.
၅။ နောက်တစ်မျိုးကတော့ အထက်နံပါတ်လေးပါ အကြောင်းပြချက်များအရ ခွဲရမယ် သို့ ခွဲချင်တယ်။ သို့သော် laparoscopic surgery မလုပ်နိုင်ဘူး။ နောက်တစ်ခု ruptured tubal pregnancy ဖြစ်သွားပြီး သွေးပေါင်ကျ shock ရနေတယ်။ အရေးပေါ်အခြေအနေ။ နောက်ကျရင် လူနာကို ဆုံးရှုံးရနိုင်တယ်။ ဒီလိုအခြေအနေမှာဆိုရင်တော့ ရှေးရိုးနည်း ဗိုက်ခွဲကုသမှုကိုပဲ သုံးကြပါတယ်။
Ruptured tubal pregnancy ဖြစ်နေရင်တော့ သိပ်စဉ်းစားမနေပါဘူး။ ကွဲထွက်ပြီး သွေးထွက်နေတဲ့နေရာပါ ပါသွားအောင် tube ကို ဖြတ်ထုတ်ပြီး သွေးတိတ်အောင် ချည်ပစ်ခဲ့ရတာပေါ့။ Salpingectomy လို့ခေါ်တယ်။ သားကြောတစ်ချောင်း ပြတ်သွားပြီပေါ့။ ကလေးရနိုင်သေးသလားလို့မေးလာရင် သားကြောတစ်ချောင်း ကျန်သေးတဲ့အတွက် ရနိုင်ပါတယ်လို့ ရဲရဲဖြေလို့ရပါတယ်။
…
…
ကျွန်တော် တတိယနှစ် ဘွဲ့လွန်ကျောင်းသားဘဝက လူနာတစ်ယောက် ကြုံဖူးခဲ့တယ်။ တစ်သက်မမေ့နိုင်စရာ လူနာပါ။
လူနာက ပထမကိုယ်ဝန်တုန်းကလည်း tubal pregnancy ဖြစ်ခဲ့ပြီး salpingectomy လုပ်ထားခဲ့တာ။ ညာဖက်သားကြောထင်တယ် ဖြတ်ထားခဲ့တာ။ ဘယ်ဖက်သားကြောတစ်ချောင်းပဲ ကျန်တာပေါ့။ ကံဆိုးချင်တော့ ခု ဒုတိယကိုယ်ဝန်ကလည်း တစ်ချောင်းထဲကျန်တဲ့ ဘယ်ဖက်သားကြောထဲမှာ ruptured tubal pregnancy နဲ့ရောက်လာတယ်။ ကျွန်တော်ခွဲရတယ်။ ဖွင့်ကြည့်လိုက်တော့ tube ကကွဲနေပြီလေ။ tube ကိုဖြတ်ပစ်လိုက်ရင် သားကြောနှစ်ဖက်စလုံး မရှိတော့ဘူးဖြစ်သွားမယ်။ ဒီ အမျိုးသမီးကို သားကြောဖြတ်လိုက်တာ ဖြစ်သွားမယ်။ ကလေးမရနိုင်တော့ဘူး။ ကလေးလည်း တစ်ယောက်မှ မရသေးဘူး။ ကလေး တအားလိုချင်တယ်ဆိုရင် သိန်းငါးဆယ်၊ တစ်ရာ အကုန်ခံပြီး ဖန်ပြွန်သန္ဓေသားလုပ်၊ သားအိမ်ထဲပြန်ထည့်ပေးမှပဲ ရတော့မယ်။
အဲဒီတော့ tube ကိုမဖြတ်ပစ်ဘဲ ချန်ခဲ့ပြီး (tube conserving surgery လို့ခေါ်ပါတယ်) သွေးတိတ်အောင် လုပ်လို့ရမလားလို့ စီနီယာတစ်ယောက်ကို ခေါ်ပြတယ်။ လူနာမှာ ကလေးတစ်ယောက်မှ မရှိသေးဘူးဆိုတာလည်း ပြောပြတယ်။ ဒါပေမယ့် tube က ကွဲပြီးစုတ်ပြတ်နေပြီ။ ထားခဲ့လို့ စိတ်မချရဘူး။ ကလေးမရမယ့်ကိစ္စက နောက်မှကြည့်ရှင်း။ လောလောဆယ် လူနာအသက်ကယ်ဖို့ ဖြတ်လိုက်ပါအကြံပေးလို့ ဖြတ်ပစ်လိုက်တယ်။
နောက်နေ့ လူနာကို post – op counselling ခွဲပြီးတွေ့ရှိချက်များကို ရှင်းပြဆွေးနွေးခြင်းလုပ်တဲ့အခါမှာ စိတ်မကောင်းဖြစ်ရတယ်။ ကလေးတစ်ယောက်မှ မရှိသေးတဲ့ အမျိုးသမီးတစ်ယောက်ကို ခင်ဗျားကတော့ သဘာဝအတိုင်း ဘယ်လိုမှ ကလေးမရနိုင်တော့ပါဘူးဗျာလို့ ပြောပြရတာ တော်တော်ဆိုးတဲ့ feeling ပဲဗျ။
…
…
သားကြောကို မဖြတ်ပစ်တဲ့ tube conserving surgery ဆိုတာက ကွဲမထွက်ခင်မှာ အချိန်မီတွေ့တဲ့ unruptured tubal pregnancy တွေမှာလုပ်လို့ ပိုအဆင်ပြေနိုင်တယ်လို့ ဖတ်ဖူးတယ်။
Tube conserving surgery နှစ်မျိုးရှိတယ်။
၁။ Milking
၂။ Salpingostomy
Milking ဆိုတာက ပေါက်ကွဲမထွက်သေးတဲ့ tube ထဲက ectopic သန္ဓေခဲလေးကို tube ရဲ့အဖျားဘက် သားဥအိမ်နဲ့ကပ်နေတဲ့ အပေါက်ကနေ ထွက်ကျသွားအောင် နို့ညှစ်သလို ညှစ်ချတာ။ Tubal pregnancy လေးက အဝနားနီးလေ ဒီနည်းလမ်းက အောင်မြင်ဖို့များလေပေါ့။ ထွက်ကျသွားပြီး သွေးမထွက်ရင် tube ကို ဖြတ်စရာမလိုတော့ဘူး။ အောင်မြင်ပြီလေ။ ကျွန်တော် ဘွဲ့လွန်ရပြီးစကာလ မန္တလေး ဗဟိုအမျိုးသမီးဆေးရုံကြီးမှာ တစ်ခါအောင်မြင်ဖူးပါတယ်။
Salpingostomy ဆိုတာက tube အဖျားပိုင်းအပေါက်နဲ့ နည်းနည်းဝေးတဲ့၊ Milking လုပ်လို့မရတဲ့ အခြေအနေမှာ လုပ်ကြတယ်။ Ectopic pregnancy လေးကြောင့် ဖောင်းနေတဲ့ tube ရဲ့အပေါ်တည့်တည့်ကနေ ဓားလေးနဲ့ခွဲပြီး အပေါက်သေးသေးလေး ဖောက်လိုက်တယ်။ အထဲက နေရာလွဲသန္ဓေခဲလေးကို ဖယ်ထုတ်လိုက်တယ်။ Tube ကိုဖောက်ထားတဲ့နေရာက သွေးမထွက်အောင် ခေတ္တဖိထားတာ သို့ diathermy စက်နဲ့ သွေးထွက်တဲ့နေရာလေးတွေကိုတို့ပြီး သွေးတိတ်အောင်လုပ်ရတယ်တဲ့။ သွေးမထွက်တော့ဘူးဆိုရင် tube မဖြတ်ရတော့ဘူး။ အောင်မြင်ပြီပေါ့။ ကျွန်တော် တစ်ခါမှ မအောင်မြင်ခဲ့ဖူးဘူး။
ခု Tubal pregnancy တွေ တွေ့လာရင် ကျွန်တော် လုပ်ဖြစ်တာကတော့ laparotomy and Salpingectomy ပါပဲ။
ကျွန်တော့်ရဲ့ ညီငယ်၊ ညီမငယ်များအားလုံး ကျွန်တော့်ထက်လည်း စာပိုသိကြပါစေ။ ကျွန်တော့်လို သိသလောက် မလုပ်တတ်သူ မဖြစ်ဘဲ သိသမျှ လုပ်နိုင်သူ၊ လုပ်တတ်သူတွေ ဖြစ်ကြပါစေဗျာ….။
ဒေါက်တာဝသုန်
သားဖွားမီးယပ်ဆရာဝန်
လွတ်မြောက်နယ်မြေတစ်နေရာ
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
