“ ဘာဖြစ်ဖြစ် နားလည်သည်းခံ” တဲ့…
လူမှန်းသိတတ်စတည်းက နားရည်ဝနေတဲ့စကား။
“ နားလည်ပေးရမယ် “ ဆိုတဲ့စကားက အတန်အသင့် ကျိုးကြောင်းဆီလျော်ပေမယ့် အရာရာကို ကိုယ်ကပဲ သည်းခံရမယ်ဆိုတာကတော့ ခံရတဲ့သူအတွက်က မတရားပါဘူး။
မှားမှားမှန်မှန်…
- အထက်လူကြီးနဲ့ အဆင်ပြေအောင် သည်းခံ
- လုပ်ဖော်ကိုင်ဖက်တွေနဲ့ အဆင်ပြေအောင် သည်းခံ
- အိမ်ထောင်တစ်ခုကွဲမှာစိုးလို့ သည်းခံ
- ကိုယ့်ထက်လူကြီးမိဘမို့ သည်းခံ
- မိန်းကလေးမို့ သည်းခံ
- ယောက်ျားလေးမို့ သည်းခံ
- အရာရာကို ကိုယ့်ဘက်ကချည်းသည်းခံဖို့ သင်ပြခြင်းခံရပြီး လက်ဆင့်ကမ်းလာတဲ့ ဒီ culture က ခံရသူအဖို့ စိတ်ဖိစီးမှုတွေ များလာတာကလွဲရင် ဘယ်သူတွေအတွက်များ ကောင်းကျိုးဖြစ်စေပါသလဲ။ ဒီနေရာမှာ ပြဿနာအကြောင်းအရာတစ်ခုခုကို ရိုင်းပျစွာတုံ့ပြန်ခြင်းနဲ့ မှန်တာကိုပြောရဲတဲ့သတ္တိနဲ့က အဓိပ္ပါယ်ချင်းမတူသလို သက်ရောက်ပုံချင်းလည်း မတူကြပါဘူး
ငယ်စဉ်ကတည်းက သင်ကြားမှုတွေ မှားယွင်းတဲ့အခါမှာ ကလေးငယ်ဘဝကနေစပြီး အရွယ်ရောက်လုပ်ငန်းခွင်ဝင်တဲ့အခါမှာလည်း…
- မိမိကိုယ်ကိုယ် ယုံကြည်မှုမရှိခြင်း၊ လေးစားမှု မရှိခြင်း
- လူကြောက်ခြင်း
- အပေါင်းအသင်းမဝင်ဆံ့ခြင်း
- ခွဲခြားဆက်ဆံခံရခြင်း
-အနိုင်ကျင့်ဖိနှိပ်ခံရခြင်း စသဖြင့် အမျိုးမျိုးသော ဆိုးကျိုးတွေကိုပါ သက်ရောက်စေနိုင်ပါတယ်။
ဒါ့အပြင်
မိမိကိုယ်ကိုယ် ဖိနှိပ်ရင်း နှိမ့်ချရင်း ရှင်သန်နေထိုင်လာသူတစ်ဦးဟာ အချိန်မရွေး ပေါက်ကွဲထွက်လာနိုင်တဲ့ ချိန်ကိုက်ဗုံးတစ်ခုလိုပါပဲ။
- သည်းခံရတာတွေ များလာတဲ့အခါ
- ပြန်တုံ့ပြန်ချင်ပေမယ့် မျိုသိပ်ရတာတွေ များလာတဲ့အခါ
- ခွဲခြားဆက်ဆံမှုတွေ ကြုံလာရတဲ့အခါ
- တရားမှုတွေကို မြင်ရက်နဲ့ မသိချင်ယောင်ဆောင်ထားရတဲ့အခါ ကျွန်မတို့စိတ်ဟာ မကျန်းမာခြင်းကို စတင်ခံစားရပါတော့တယ်။
🔺စိတ်တွေဆတ်လာမယ်
🔺အရာရာကို မကောင်းမြင်လာမယ်
🔺မိမိကိုယ်ကိုယ် ကိုင်တွယ်ရခက်လာမယ်
🔺အတွေးတွေ များနေမယ်
🔺ဘာကိုမှ ကြာကြာအာရုံမစိုက်နိုင်တော့တာတွေ အပြင်
🔺ခန္ဓာကိုယ်ကပါ တုံ့ပြန်မှုတွေပေါ်လာတတ်ပါတယ်။
(ဥပမာ- ရင်တုန်ခြင်း၊ ခြေလက်တုန်ခြင်းအပြင် ခေါင်းကိုက်ခြင်း၊ အသက်ရှုမဝခြင်းတို့ကိုပါ ခံစားလာရတတ်ပါတယ်)
နောက်ဆုံးမှာ လိုအပ်တဲ့ စိတ်ပိုင်းဆိုင်ရာ အထောက်အပံ့မရခဲ့ရင် မိမိကိုယ်ကိုယ် နာကျင်အောင်လုပ်ခြင်းဆိုတဲ့ (self-harm) အပြုအမူတွေပါ ဝင်လာနိုင်ပါတယ်။
…
…
ဒါကြောင့် ကျွန်မတို့ဟာ နည်းမှန်လမ်းမှန်နဲ့ ကျွန်မတို့ရဲ့ စိတ်ကျန်းမာရေးကို အလေးပေး ကိုင်တွယ်သင့်ပါတယ်။
✅ မိမိရဲ့ကိုယ်ခန္ဓာကျန်းမာရေးကို ဂရုစိုက်ပါ။
✅ အိပ်ချိန်မှန်မှန်ထားပါ။
✅ စိတ်ခံစားချက်တွေကို နည်းလမ်မှန်မှန်နဲ့ ထုတ်ဖော်တတ်တဲ့အကျင့်ကို မွေးပါ။
✅ ယုံကြည်ရသူတွေကို ရင်ဖွင့်ပါ။
✅ ဖွင့်ပြောဖို့ခက်ရင် စာအုပ်မှာ ချရေးပါ။
✅ ကိုယ်လက်လှုပ်ရှားမှု မှန်မှန်လုပ်ပါ။
✅ တရားထိုင်ခြင်းနဲ့ အသက်ရှုလေ့ကျင့်ခန်းများ လုပ်ပါ။
✅ မိသားစုနဲ့အချိန်ပေးပါ၊ စကားများများပြောပေးပါ။
✅ လက်ရှိပစ္စုပ္ပန်မှာ အာရုံစိုက်နေထိုင်ပါ။
✅ ကျေးဇူးတင်ထိုက်သူတွေကို ကျေးဇူးတင်ပါ။
✅ မိမိကိုယ်ကိုယ်ချစ်ပါ။
✅ သဘာဝနဲ့ မကြာခဏထိတွေ့ပေးပါ။
ဒါတွေကို နေ့စဉ်ပုံမှန်လုပ်ပေးခြင်းဖြင့် ကျွန်မတို့ဟာ စိတ်ဖိစီးမှု၊ ပေါက်ကွဲလွယ်မှုတွေကို ဖြည်းဖြည်းချင်း ထိန်းကျောင်းကိုင်တွယ်လာနိုင်မှာပဲ ဖြစ်ပါတယ်ရှင်…။
သင်၏ စိတ်ကလေးကျန်းမာစေဖို့
ဒေါက်တာမီ
(စိတ်ပညာလေ့လာလိုက်စားသူ ဆရာဝန်တစ်ဦး)
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
