ကိုယ်ဝန်သက်တမ်း ၂၄ ပတ်ပြည့်ပြီးနောက် ကလေးမွေးမထွက်မီ မွေးလမ်းကြောင်းမှ သွေးသွန်ခြင်းရဲ့ နောက်ထပ်ကြောက်စရာကောင်းတဲ့ အကြောင်းရင်းတစ်ခုအကြောင်း…
အချင်း ကွာထွက်ခြင်း
Abruptio Placenta
(Premature separation of the normally sited placenta)
…
…
ပုံမှန်အတိုင်းဆိုရင် အချင်းက သားအိမ်အတွင်းနံရံရဲ့ အပေါ်ဘက်၊ အပေါ်ဘက်ရှေ့ဘက် သို့ အပေါ်ဘက်နောက်ဘက်မှာ ကပ်ရတယ်။ အမေ့ဆီက အောက်စီဂျင်နဲ့ အစာအာဟာရတွေကို စုပ်ယူပြီး ချက်ကြိုးကတစ်ဆင့် ကလေးဆီကိုပို့တယ်။ ကလေးတစ်ကိုယ်လုံး မွေးထွက်သွားပြီးပြီဆိုမှ ဘုရားပြီး ငြမ်းဖျက်ဆိုသလို အချင်းက သားအိမ်နံရံကနေ ကွာထွက်ပြီး နောက်ကလိုက်ထွက်လာရတယ်။ ပြီးတော့ မြေမြှုပ်စွန့်ပစ်လိုက်ကြတာပေါ့။
Abruptio Placenta ဆိုတာ သားအိမ်အတွင်းနံရံ ပုံမှန်ကပ်ရမယ့်နေရာမှာ ကပ်တဲ့အချင်းပါပဲ။ ဘာမှားသွားတာလဲဆိုတော့ ကလေးမွေးမထွက်မီ သားအိမ်ထဲမှာရှိနေတုန်း အချင်းကွာရမယ့်အချိန်မတိုင်မီ ကွာသွားတာကို ခေါ်ပါတယ်။
ဘာလို့ နေရာမှန်မှာရှိတဲ့အချင်းက ကလေးမမွေးမီ အချိန်မတိုင်မီ သားအိမ်အတွင်းနံရံကနေ ကွာထွက်သွားရတာလဲ။ ရှင်းပြထားတဲ့ သီအိုရီတွေ ရှိပါတယ်။
၁။ ကိုယ်ဝန်ဆောင်မိခင်မှာ သွေးတိုးရောဂါ (Pre-eclampsia) PE ရှိလို့ပါတဲ့။ သားအိမ်နံရံမှာကပ်နေတဲ့ အချင်းမျက်နှာပြင်ဆီသို့ အောက်စီဂျင်နဲ့ အစာ အာဟာရတွေလာပို့တဲ့ အမေ့ရဲ့သွေးတွေက သွေးတိုးရောဂါကြောင့် pressure ပြင်းပြင်းနဲ့ ပန်းထွက်လာပြီး အချင်းကို တွန်းခွာလိုက်သလို ဖြစ်သလား။ PE ဖြစ်ရတဲ့အကြောင်းကိုက အချင်းက သားအိမ်နံရံမှာ မြဲမြဲမြံမြံမကပ်လို့ဆိုတဲ့ တွေ့ရှိချက်လည်း ရှိထားတယ်။ ဆိုတော့ အစကတည်းက မြဲမြဲကပ်မထားလို့ အချိန်မတိုင်မီ ကွာတာလား၊ သွေးတိုးရောဂါကြောင်း ဖိအားပြင်းပြင်းနဲ့ တွန်းခွာလိုက်သလိုဖြစ်လို့ အချိန်မတိုင်မီ ကွာတာလား၊ သို့ နှစ်ခုစလုံးကြောင့်လား။ ဘယ်လိုပဲဖြစ်ဖြစ်ပါ ကိုယ်ဝန်ဆောင် သွေးဆိပ်တက် သွေးတိုးရောဂါ (PE) မှာ အချိန်မတိုင်မီ အချင်းကွာတတ်တယ် သိထားရင် စာမေးပွဲအောင်ပြီ။
.
၂။ ECV (External Cephalic Version)
ကျွန်တော်တို့ သားဖွားပညာရဲ့ ပျောက်ဆုံးသွားသော အနုပညာတစ်ခု… lossing art of the Obstetrics လို့တောင် တင်စားခေါ်ဝေါ်ကြပါတယ်။
ကိုယ်ဝန်သက်တမ်း ၃၆ – ၃၇ ပတ်မှာ ကလေးခေါင်းက သားအိမ်အဝမှာ ရှိမနေရင်၊ ကလေးလေးက အမေနဲ့ 69 ပုံစံ ခေါင်းအောက်စိုက်မနေဘဲ ကန့်လန့်နေနေရင်၊ သို့ 99 ပုံစံ ငုတ်တုတ်ထိုင်နေရင် လုပ်ခဲ့ကြတာ။ အရပ်ထဲမှာ ဗိုက်ပြင်တယ်လို့ ခေါ်ကြတယ်။ ရည်ရွယ်ချက်က ကလေးကို သဘာဝမွေးလမ်းကြောင်းက ပုံမှန်အတိုင်းမွေးဖွားဖို့။
ဘယ်လိုလုပ်သလဲဆိုတော့ အမေ့ဗိုက်ပေါ်ကနေ ကလေးရဲ့ခေါင်း၊ ကျောကုန်း၊ တင်ပါးဆုံတို့ကို စမ်းပြီး ကလေးက ရှေ့ဂျွမ်းပစ်လည်ပြီး ခေါင်းကအောက်ရောက်သွားအောင် သာသာလေးတွန်းပေးတာ။ ခုတော့ မလုပ်သလောက် ရှားသွားပါပြီ။ ကလေးအနေအထား မမှန်ဘူးလား။ လစေ့ပြီး ဗိုက်မနာမီ ခွဲမွေးပေးလိုက်တာပါပဲ။
အဲဒီလိုဗိုက်ပြင်နေတုန်းမှာ အခန့်မသင့်ရင် အချင်းကွာတတ်ပါတယ်။ Abruptio Placenta ရတတ်ပါတယ်ဗျ။ ဗိုက်ပြင်နေတုန်း အချင်းကွာသွားရင် အရေးပေါ်ခွဲမွေးရပါတယ်။ ဒါကြောင့် ဗိုက်ပြင်ခြင်းသည် ကိုယ်ဝန်သက် ၃၆-၃၇ ပတ်မှ လုပ်ရတယ်။ အဆင်မပြေလို့ အချင်းကွာ၊ ချက်ကြိုးထုံးသွားရင် အရေးပေါ် ချက်ချင်းခွဲမွေးပေးလို့ရတဲ့နေရာ ဆေးရုံမှာလုပ်ရတယ်။ ဒါဆို ဗိုက်ပြင်တာကို ဘယ်သူတွေလုပ်ရမှာလဲ သဘောပေါက်ပြီ ထင်ပါတယ်နော။ ရပ်ကွက်ထဲကလူတွေနဲ့ လားလားမျှမသက်ဆိုင်ပါဗျ။ သူများယောင်၍ ယောင်ရပါသည်။ အမောင် တောင်မှန်းမြောက်မှန်းမသိ ဖြစ်မှာစိုးလို့ပါ။
.
၃။ Sudden release of increased intrauterine pressure
အမွှာကိုယ်ဝန်တွေ၊ အကြောင်းတစ်ခုခုကြောင့် (ဥပမာ ကိုယ်ဝန်ဆောင် ဆီးချိုရောဂါ) ရေမြွှာရည် အရမ်းများနေတဲ့ ကိုယ်ဝန်တွေမှာ ဖြစ်တတ်ပါတယ်။ သားအိမ်က သူ့ရဲ့ကိုယ်ဝန်သက်တမ်းအရ ရှိရမယ့်အရွယ်အစားထက် ပိုမိုကြီးမားဖောင်းတင်းနေပြီး သားအိမ်အတွင်းကနေ သားအိမ်နံရံကို ပြန်ကန်တွန်းထားတဲ့ ဖိအားများနေတယ်။ အကြောင်းတစ်ခုခုကြောင့် ရေမြွှာအိပ်ပေါက်ပြီး ရေမြွှာရည်တွေအများကြီး ရုတ်တရက် ဝေါခနဲ ထွက်ကျသွားတဲ့အခါ သားအိမ်တွင်းဖိအား ရုတ်ချည်း ထိုးကျသွားတတ်ပါတယ်။ အဲဒီလိုဖြစ်ရင် သားအိမ်နည်းနည်း ကျုံ့သွားတော့ သူ့ အတွင်းနံရံမှာ အပြားလိုက်ကပ်နေတဲ့ အချင်းက တွန့်ခေါက်ပြီး ကွာထွက်တတ်ပါတယ်။
.
၄။ Trauma
ကိုယ်ဝန်ဆောင်ဗိုက်ကို ပြင်းထန်စွာ ထိခိုက်မိခြင်း၊ ဥပမာ ဗိုက်ကို ထိုးနှက်ကန်ကျောက်ခံရခြင်း၊ ကား/ဆိုင်ကယ်တိမ်းမှောက်၍ ဗိုက်ကိုပြင်းထန်စွာထိမိခြင်း၊ လှေကားအမြင့်မှ ချော်ကျခြင်း စသည်ဖြင့်ပေါ့။ အချင်းကွာတတ်ပါတယ်တဲ့။
.
၅။ ကိုယ်ဝန်ဆောင်မိခင် အစာအာဟာရ ပြည့်ဝစွာမရရှိခြင်း
.
၆။ Grandmultipara
လေး၊ ငါးယောက်မြောက်နှင့်အထက် ကိုယ်ဝန်ဆောင်များ
.
၇။ Unknown
ကျွန်တော်မသိသော အခြားအကြောင်းရင်းများပေါ့။
လိုနေသေးတာတွေ ထပ်ဖြည့်ပေးကြပါဗျ။
…
…
Abruptio Placenta အချိန်မတိုင်မီ အချင်းကွာတာကိုပဲ concealed type and revealed type ဆိုပြီး နှစ်မျိုးထပ်ခွဲသေးတယ်။ အပုန်းနဲ့ အပွင့်ပေါ့ဗျာ။ မွေးလမ်းကြောင်းက သွေးမဆင်းတဲ့ အမျိုးအစားနဲ့ မွေးလမ်းကြောင်းက သွေးနည်းနည်းဆင်းတဲ့ အမျိုးအစားပေါ့။
သားအိမ်အတွင်းနံရံကို ကပ်နေတဲ့ အချင်းချပ်ပြားအဝိုင်းကြီးရဲ့ အလယ်တည့်တည့်ကပဲ ကွာမယ်။ ဘေးပတ်ပတ်လည် နှုတ်ခမ်းသားအားလုံးက ကပ်နေမယ်ဆိုရင် အချင်းဆီကိုလာတဲ့ အမေ့သွေးတွေက သားအိမ်နံရံနဲ့ ကွာသွားတဲ့အချင်းရဲ့ အလယ်ပိုင်းရဲ့ကြား အလုံပိတ်အခန်းထဲမှာ အောင်းနေမယ်။ အစာ အာဟာရတွေပို့ပြီး သွေးပြန်ကြောကနေ ပြန်မသွားနိုင်တော့ဘူး။ အမေ့သွေးတွေက ခဲသွားတယ်။ နောက်ထပ်နောက်ထပ် သွေးတွေရောက်လာပြီး သွေးခဲက ပိုပိုကြီးလာတာပေါ့။ ကလေးဆီကိုလည်း အစာ အာဟာရ၊ အောက်စီဂျင်လုံလုံလောက်လောက် မပို့နိုင်တော့ဘူး။ အချင်းကွာတဲ့ ဧရိယာကြီးလေလေ ကလေးသေဖို့အန္တရာယ် များလေလေပေါ့။ အနားသတ်တွေက စေ့ပိတ်နေသေးတဲ့အတွက် သားအိမ်နံရံနဲ့ ကွာသွားတဲ့ အလယ်အချင်းကြားက သွေးခဲကြီး (Retroplacental Blood Clot) ကနေ သွေးတွေက အောက်မွေးလမ်းကြောင်းထဲကို ဆင်းမလာဘူး။ USG နဲ့ထောက်ကြည့်ရင် တစ်ခါတစ်ရံ အဲဒီ Retroplacental Blood Clot ကို မြင်ရတတ်ပါတယ်။ အပုန်း။ Concealed type Abruptio Placenta.
သားအိမ်အတွင်းနံရံကို ကပ်နေတဲ့ အချင်းချပ်ပြားအဝိုင်းကြီးရဲ့ ဘေးနှုတ်ခမ်းသားက ကွာထွက်မယ်။ ဒါဆိုရင်တော့ အမေ့ဆီကနေ အချင်းဆီကို လာတဲ့တချို့သောသွေးတွေက သွေးခဲအဖြစ်နဲ့အောင်းနေပြီး၊ တချို့ကတော့ သားအိမ်နံရံနဲ့ ရေမြွှာအိပ်အမြှေးပါး (Chorionic membrane) ကြားကနေ စီးဆင်းလာပြီး မွေးလမ်းကြောင်းကနေ ထွက်လာတတ်ပါတယ်တဲ့။ အပွင့်။ Revealed type Abruptio Placenta.
…
…
ဒါဆို ကလေးမွေးမထွက်မီ၊ အချိန်မတိုင်မီ အချင်းကွာသွားတဲ့ Abruptio Placenta ကိုယ်ဝန်သည်တွေက ဘယ်လိုရောဂါလက္ခဏာတွေနဲ့ လာကြမလဲ။
၁။ Abdominal pain
ဗိုက်နာတယ်လို့ ပြောမယ်ဗျ။ သူဗိုက်နာတာက ကလေးမွေးဖို့ ဗိုက်နာတာ Labour pain နဲ့မတူပါ။ Labour pain က နာလိုက် ပျောက်လိုက်။ Abruptio Placenta ကြောင့်နာတာက အမြဲတမ်း နာနေတယ်။ အနာသက်သာသွားချိန် မရှိဘူး။ ဗိုက်ကို အထိမခံနိုင်အောင်နာတယ်။
သားအိမ်နံရံနဲ့ ကွာသွားတဲ့အချင်းကြား အောင်းနေတဲ့ Retroplacental Blood Clot သွေးခဲကြီးရဲ့ ဖိအားကြောင့် နာတာတဲ့။
.
၂။ လူနာရဲ့ မျက်ခမ်း၊ လျှာ၊ လက်ဖဝါးတို့ကို ကြည့်ရင် ဖြူဖျော့နေမယ်။ အပွင့်အမျိုးအစား သွေးဆင်းခဲ့ရင်တောင်မှ ဆင်းတဲ့ပမာဏကြောင့် ဖြူဖျော့ရမှာထက် အများကြီးပိုမယ်။ အမေ့သွေးဆုံးရှူံးမှုက အချင်းနောက်မှာ ပုန်းနေတယ်လေ။
.
၃။ သတိထားမိတတ်တဲ့ လူနာတွေကို မေးကြည့်ရင် သားအိမ်ကြီးက နာပြီးနာရီပိုင်းအတွင်း ရုတ်တရက်ချက်ချင်း သိသိသာသာ ကြီးလာတယ်လို့ ပြောကြတယ်။ အချင်းနောက်မှာ အောင်းနေတဲ့ သွေးခဲကြီးကြောင့်ပေါ့။
.
၄။ ကလေးနှလုံးခုန်သံကို နားထောင်ဖို့ တအားခက်တယ်။ ကွာသွားတဲ့ အချင်းဧရိယာ အနည်းအများပေါ်မူတည်ပြီး ကလေးက ဗိုက်ထဲမှာနေလို့မကောင်း၊ အောက်စီဂျင်အလုံအလောက်မရလို့ နှလုံးခုန်မြန် အဆင့်ကနေ ဆေးရုံရောက်လာကတည်းက ကလေးက ဗိုက်ထဲမှာ သေနှင့်ပြီးသားအထိ ဖြစ်တတ်ပါတယ်။ Abruptio Placenta လို့ သံသယရှိရင် ဗိုက်ထဲမှာ ကလေးရှင်နေသေးလား၊ သေနေပြီလားသိဖို့ အရေးကြီးပါတယ်ဗျ။ မခက်ပါဘူး။ USG စက်ရှိရင် ကျွန်တော်တို့ OG တွေကြည့်လို့ရပါတယ်။ ကလေးနှလုံးခုန်နေသေးလား ကြည့်တာပါ။ အတော်လွယ်ပါတယ်။
.
၅။ လူနာရဲ့ ကိုယ်ဝန်ဆောင်စောင့်ရှောက်မှုမှတ်တမ်းကိုကြည့်၊ ရောဂါရာဇဝင်ကိုမေး၊ အချင်းအချိန်မတိုင်မီ ကွာစေနိုင်သော အထက်ဖေါ်ပြပါ အကြောင်းရင်းတစ်ခုခုကို သိရနိုင်ပါတယ်။ အတွေ့ရအများဆုံးကတော့ ကိုယ်ဝန်ဆောင် သွေးဆိပ်တက်၊ သွေးတိုးရောဂါ PE ပါပဲ။ အရပ်လက်သည်တွေရဲ့ ဗိုက်ပြင်တဲ့ လက်စွမ်းပြမှုတွေကြောင့်လည်း ရံဖန်ရံခါ ကြုံရပါတယ်။ ကျွန်တော်တို့ အရေးယူလို့မရဘူး ဖြစ်နေတယ်။
.
၆။ ကျွန်တော်တို့ဆီကို ဗိုက်အရမ်းနာ၊ မွေးလမ်းကြောင်းက သွေးအနည်းငယ်ဆင်း၊ အရမ်းဖြူဖျော့၊ ကလေးနှလုံးခုန်သံ နားထောင်ရခက်၊ သူ့ရဲ့ရာဇဝင်မှာ အချိန်မတိုင်မီ အချင်းကွာနိုင်တဲ့ အကြောင်းရင်းတစ်ခုခုရှိတဲ့ ကိုယ်ဝန်သည်တစ်ယောက် ရောက်လာရင် သေချာစမ်းသပ်စစ်ဆေးပြီး Abruptio Placenta လို့ထင်တယ်ဆိုရင် Abruptio Placenta လို့ပဲ သတ်မှတ်ကုသရပါမယ်ဗျ။
USG ဆရာကိုခေါ်ပြီး Retroplacental Blood Clot ရှိ/မရှိ ရှာခိုင်းဖို့ အချိန်မရပါဘူး။ လူနာကို ရောက်ရောက်ချင်းကြည့်တဲ့ ယုံကြည်ရလောက်သော ဆရာဝန်က (လက်ထောက်ဆရာဝန်အငယ်ပဲ ဖြစ်ပါစေ) Abruptio Placenta လို့ပြောရင် အဲဒီအတိုင်းပဲ ကုသမှုဆက်သွားပါမယ်။ Abruptio Placenta is Obstetrics Emergency အရေးပေါ် အခြေအနေပါ။
…
…
Abruptio Placenta အတွက် စာထဲမှာတော့ ကုသမှုနှစ်မျိုး ခွဲထားပါတယ်။
အချိန်မတိုင်မီ အချင်းကွာသွားပြီလို့ ထင်တဲ့၊ သိတဲ့အချိန်မှာ ကလေးရှင်နေသေးလား၊ ကလေးဗိုက်ထဲမှာ သေနှင့်ပြီးသားလား။ ဒါနဲ့ပဲ ဆုံးဖြတ်ပါတယ်။
သိဖို့မခက်ပါဘူး။ OG ward ထဲမှာရှိတဲ့ USG စက်နဲ့ ကိုယ့်ဘာသာကိုယ်ကြည့်။ ကလေးနှလုံးခုန်နေသေးလား၊ မခုန်တော့ဘူးလား။ အရမ်းသိသာပါတယ်။ USG ဆရာတွေက တစ်ခါပြထားတော့ ကျွန်တော်တို့ကြည့်တတ်ပါတယ်။
ကလေးရှင်နေသေးတယ်ဆိုရင်တော့ အမြန်ဆုံးခွဲစိတ်မွေးပေးလိုက်တာပါပဲ။ သွေးသွင်းရဖို့လည်း လိုနိုင်ပါတယ်။ကိုယ်ဝန်သက်တမ်း ဘယ်လောက်နုနုပါ။ တစ်ရက်သက်တမ်းတိုးတိုးဆိုပြီးစောင့်လို့မရပါဘူး။ ကွာနေတဲ့အချင်းက ဆက်ဆက်ပြီးကွာလာမှာ။ စောင့်နေရင် ကလေးသေသွားမယ်။ ကလေးအသေလေးကို ခွဲထုတ်ပေးရတာက OG တစ်ယောက်အတွက် ငရဲပါပဲ။
ကျွန်တော် တစ်ခါကြုံဖူးတယ်။ ဗဟိုအမျိုးသမီး ဆေးရုံကြီး မန္တလေးမှာ။ OG ဘွဲ့ရပြီးခါစက။ လူနာတစ်ယောက် Abruptio Placenta လို့ထင်တယ်။ USG ထောက်ကြည့်တယ် မွေခန်းထဲမှာ။ ကလေးနှလုံးခုန်နေတယ်၊ နည်းနည်းတော့ နှေးနေပြီ၊ မြန်နေရင်တော့ ပိုကောင်းတာပေါ့။ ပုံမှန်အတိုင်းဆိုရင်တော့ မြန်တာက မကောင်းဘူးလေ။ သို့သော် မြန်ရာကနေ နှေးသွားတာက ပိုမကောင်းတာပေါ့။ နှေးပြီးရင်တော့ ရပ်ရုံပဲရှိတော့တာလေ။
ကလေး နှလုံးခုန်သေးတယ်ဆိုပြီး အပေါ်ထပ်ခွဲခန်းကို အမြန်ပို့ ရှင်လိုရှင်ငြား အမြန်ဆုံးခွဲထုတ်တာပဲ။ ပြင်ဆင်ချိန်နာရီဝက်အတွင်းမှာပဲ ကလေးက ဗိုက်ထဲမှာ သေသွားတယ်။ ခွဲထုတ်ပြီးထွက်လာတော့ အသေလေး။ လွန်ခဲ့တဲ့နာရီဝက်က အဲဒီကလေးလေး သူ့အမေဗိုက်ထဲမှာ နှလုံးခုန်နေတာကို USG နဲ့ ကျွန်တော်ကိုယ်တိုင် မြင်ခဲ့ရတာဗျ။ ခဲလေသမျှ သဲရေကျလို့ ဆိုရမလား။
…
…
အချိန်မတိုင်မီ အချင်းကွာသွားပြီလို့ သိတဲ့အချိန်မှာ USG နဲ့ထောက်ကြည့်လို့ ကလေးနှလုံးခုန်တာ မတွေ့တော့ဘူး။ ကလေးက ဗိုက်ထဲမှာ သေသွားပြီဆိုရင်တော့ ရိုးရိုးမွေးဖို့ဖြစ်နိုင်မလား စဉ်းစားပါတယ်။ သားအိမ်အဝ ဘယ်လောက်ပွင့်နေပြီလဲ မိန်းမကိုယ် အတွင်းပိုင်း စမ်းသပ်မှုလုပ်ရပါတယ်။ သားအိမ်အဝ ပွင့်နေပြီဆိုရင် ရေမြွှာအိပ်ကို ဖောက်ချပေးရပါတယ်။ မြန်မြန်မွေးအောင်လို့ပါ။ လူနာရဲ့ လက်နှစ်ဖက်လုံးကနေ အကြောဆေးသွင်းဖို့ အပ်စိုက်ပါတယ်။ တစ်ဖက်က သားအိမ်ညှစ်အားပေးတဲ့ဆေးကို အချိန်အဆနဲ့ ထည့်ပါတယ်။ တစ်ဖက်ကတော့ သွေးသွင်းပါတယ်။ တတ်နိုင်သမျ လောလောလတ်လတ် သွေးလှူရှင်ဆီက ထုတ်ထားတဲ့ သွေးကိုသွင်းရပါတယ်။
အမေမှာ ဘာပြဿနာရှိတတ်လဲဆိုတော့ အမေ့သွေးထဲက သွေးတိတ်၊ သွေးခဲစေသောပစ္စည်းများ (Clotting Factors) သည် ကွာသွားတဲ့အချင်းနဲ့ သားအိမ်နံရံကြားက သွေးခဲထဲမှာ အကုန်နီးပါး ကုန်သွားတတ်ပါတယ်။ Consumptive Coagulopathy လို့ ခေါ်ပါတယ်။ အဲဒါဆိုရင် အမေမှာ DIC (Deciminated Intravascular Coagulation) လို့ခေါ်တဲ့ သွေးကျဲ၊ သွေးမတိတ်တဲ့ရောဂါ ဝင်လာနိုင်ပါတယ်။ သမားတော်နဲ့တိုင်ပင်ပြီး လိုအပ်တဲ့ သွေးစစ်ဆေးမှုတွေလုပ်၊ လိုအပ်တဲ့သွေးဓာတ်တွေ ဖြည့်ပေးရင်း ကလေးမွေးထွက်လာအောင် စောင့်ပါတယ်။
ကလေးမွေးထွက်လာရင်တော့ ကြည့်သာရှောင်ပေတော့ဗျို့။ ကလေးထွက်ပြီးတာနဲ့ အချိန်မတိုင်မီကွာထားတဲ့အချင်းက ချက်ချင်းလိုက်ထွက်လာပြီး သူ့နောက်မှာ အောင်းနေတဲ့ သွေးခဲတွေ အများကြီးကလည်း ဝေါခနဲ ပန်းထွက်လာမယ်။ ကလေးအသေလေးရယ်၊ ကွာပြီးသားအချင်းရယ်၊ Retroplacental Blood Clots တွေရယ်က အစဉ်လိုက် ဆက်တိုက်ထွက်လာတာ။ မရှောင်နိုင်ရင်တော့ ကလေးဖမ်းတဲ့သူက သွေးနဲ့ ရေချိုးလိုက်သလို ဖြစ်သွားမယ်။ ခေါင်းစွပ်တွေ၊ မျက်နှာဖုံးတွေ၊ ရင်ကာတွေ၊ လက်အိပ်အရှည်တွေ၊ လည်ရှည်ဖိနပ်တွေ ကြိုဝတ်ပြီး စောင့်ဖမ်းရတာပေါ့။
မိန်းမကိုယ်အတွင်းပိုင်း စမ်းကြည့်လိုက်လို့ သားအိမ်အဝက မပွင့်သေးဘူး။ ကလေးမွေးထွက်ဖို့ အချိန်အတော်ကြာ စောင့်ရဦးမယ်။ သွေးကလည်း လိုသလောက် လုံလုံလောက်လောက် မရနိုင်ဘူး။ ၇ လုံး၊ ၈ လုံးအထိ လိုတတ်ပါတယ်။ အမေ DIC ဝင်/မဝင်သိဖို့ သွေးစစ်စရာ ဓာတ်ခွဲခန်း၊ ဝင်လာရင် အားကိုးဖို့ သမားတော်မရှိဘူးဆိုရင်တော့ ဒီဖြစ်စဉ်ကြီးရပ်သွားဖို့ ရသမျှ သွေးတစ်လုံး နှစ်လုံးနဲ့ပဲ ကလေးအသေလေးကို စိတ်မချမ်းမြေ့စွာနဲ့ ခွဲထုတ်ဖို့ ဆုံးဖြတ်ရတာပေါ့ဗျာ။ စောင့်နေလို့ DIC ဝင်သွားရင် နောက်က သွေးထပ်မလိုက်နိုင်ရင် အမေပါဆုံးရှူံးရမယ်လေ။
ဆေးရုံတွေအားလုံးမှာ လူနာအတွက်လိုအပ်တဲ့ ပညာရှင်လူအင်အား၊ ပစ္စည်းအင်အား ပြည့်စုံပါစေလို့………………..
ဆုတောင်းနေလို့ မရဘူး။
ပြည့်အောင်ဖြည့်ရမှာ……။
ဒေါက်တာဝသုန်
သားဖွားမီးယပ်ဆရာဝန်
လွတ်မြောက်နယ်မြေတစ်နေရာ
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
