အမျိုးအစား (၂) ဆီးချိုရောဂါကို လေ့ကျင့်ခန်းဖြင့် ထိန်းညှိခြင်း
တကယ်လို့ သင်ဟာ အမျိုးအစား (၂) ဆီးချိုရောဂါရှိနေပြီလို့ စစ်ဆေးတွေ့ရှိတဲ့အခါ စိုးရိမ်မှုတွေ၊ ကြောက်ရွံ့မှုတွေကို ခံစားရနိုင်ပါတယ်။ ရောဂါရဲ့ နောက်ဆက်တွဲအနေနဲ့ ဘာတွေဖြစ်မယ်ဆိုတာလည်း ခန့်မှန်းမရပါဘူး။
အချို့သူများ ကြုံတွေ့ရမယ့် ကုသမှုများမှာ ရောဂါစရှိမှန်းသိတဲ့ လူနာများကို ဆေးစာပဲရေးပေးပြီး ဘာမှမရှင်းပြတာတွေလည်း ဖြစ်နိုင်ပါတယ်။ အမှန်က ဆီးချိုရောဂါနဲ့ ပတ်သတ်တဲ့ ကျန်းမာရေးပညာပေးများ သိရှိပြီး လိုက်နာဆောင်ရွက်ခြင်းများကို စောစောလုပ်လေ ရေရှည်အတွက် အကျိုးရှိလေပါ။
ရောဂါဖြစ်စမှာ ဘာမှ ဝေဒနာမခံစားရဘူးဆိုရင်တောင် အမျိုးအစား (၂) ဆီးချိုရောဂါဟာ ချက်ချင်းသတိထားရမယ့် ပြင်းထန်တဲ့ရောဂါတစ်ခု ဖြစ်လို့ အရေးတကြီး လိုက်နာသင့်ပါတယ်။
ရောဂါအစမှာ ဆရာဝန်တွေက လူနာအများစုကို ကိုယ်အလေးချိန်လျှော့ဖို့၊ ကိုယ်လက်လှုပ်ရှားမှုကို တိုးမြှင့်ဖို့ အကြံပြုတတ်ကြပါတယ်။
စားနေကျ အစားအသောက်တွေကို အနည်းငယ် ပြောင်းလိုက်ရုံနဲ့တော့ ခန္ဓာကိုယ်က ပြောင်းလဲမသွားပါဘူး။ နည်းမှန်လမ်းမှန်သိဖို့ အရေးကြီးပါတယ်။ အဓိကအချက်ကတော့ ကိုယ်အလေးချိန်ကို မူလထက် အနည်းငယ် လျှော့ချနိုင်ဖို့ပါ။
အစားအသောက်ဟာ သွေးတွင်းသကြားဓာတ် အပေါ် အထူးသက်ရောက်မှုရှိပါတယ်။ ကိုယ်စားတဲ့ အစားအစာမှာ သကြား၊ ကစီဓာတ်နှင့် ကယ်လိုရီပါဝင်မှုကိုလည်း သိနားလည်သင့်ပါတယ်။
အဲဒါဆိုရင် အစားထိန်းစားပြီး လေ့ကျင့်ခန်းလုပ်ရင် ဆီးချိုအတွက် ကောင်းတယ်ဆိုတာ သေချာတဲ့ သက်သေပြမှုတွေရှိလား လေ့လာကြည့်ရအောင်။
…
…
အကြီးစား ဆေးဘက်ဆိုင်ရာ စမ်းသပ်မှုတစ်ခုအတွက် အသစ်စက်စက် အမျိုးအစား (၂) ဆီးချိုရောဂါလူနာ ၆၀၀ နီးပါးကို စုဆောင်းပြီး တစ်နှစ်တာ လုပ်ဆောင်ခဲ့ပါတယ်။ ပါဝင်သူများကို အုပ်စုသုံးစု ကျပန်း သတ်မှတ်ထားပါတယ်။
ပထမအုပ်စုကို ပုံမှန်ကျန်းမာရေးဝန်ဆောင်မှုများ (ဆေးများ) ပေးပါတယ်။
ဒုတိယတစ်စုကို အစားအသောက်ဆိုင်ရာ အကြံပေး ထိန်းချုပ်မှုတွေ လုပ်ခဲ့ပါတယ်။
တတိယအုပ်စုကိုတော့ အစားအသောက်ဆိုင်ရာ အကြံဉာဏ်တွေအပြင် လေ့ကျင့်ခန်းအစီအစဉ်တွေပါ ပေါင်းစပ်ထည့်သွင်းခဲ့ပါတယ်။
ခြောက်လအကြာမှာ ဒီလူအုပ်စု ၃ စုကို ပြန်လည် အကဲဖြတ်တဲ့အခါ ဆီးချိုအခြေအနေဟာ ပထမအုပ်စုမှာ ပိုဆိုးလာပြီး ဒုတိယနဲ့ တတိယအုပ်စုများမှာ အရင်ကထက် ဆီးချိုကောင်းမွန်လာတာ တွေ့ရပါတယ်။
ဒီအုပ်စုတွေမှာ အခြားအရေးကြီးတဲ့ တွေ့ရှိချက်အနေနဲ့ အနာဂတ်မှာ နှလုံးသွေးကြောဆိုင်ရာ ရောဂါများ ဖြစ်နိုင်ခြေကိုလည်း လျှော့ချပေးတာကို တွေ့ရှိခဲ့ရပါတယ်။
ဒီကွာခြားချက်များဟာ ၁၂ လတာအထိ ဆက်လက်တည်ရှိနေတာတွေ့ရပြီး ဆီးချိုဆေးလိုအပ်မှုပါ လျော့နည်းလာပါတယ်။
ဒါဟာ တကယ်ကို သတင်းကောင်းပါပဲ။
ဒါပေမယ့် ဒါဆို လေ့ကျင့်ခန်းလုပ်ခြင်းကရော.. အစားအသောက်ထိန်းညှိခြင်း တစ်ခုထဲက မပေးနိုင်တဲ့ အပိုကျန်းမာရေးအကျိုးကျေးဇူးတွေကို ပေးစွမ်းနိုင်တာရှိနိုင်သလား။
ဆက် လေ့လာကြရအောင်..
.
.နေ့စဉ် လေ့ကျင့်ခန်းလုပ်ခြင်းရဲ့ အကျိုးကျေးဇူးများ
လေ့ကျင့်ခန်းလုပ်ခြင်းဟာ ကျန်းမာရေးအတွက် အမှန်တကယ် အကျိုးကျေးဇူးများစေကြောင်း ခိုင်မာတဲ့ အထောက်အထားတွေ ရရှိဖို့အတွက် သိပ္ပံပညာရှင်များက သက်သေပြမယ့် လေ့လာမှုအသစ်တစ်ခုကို ဖော်ထုတ်ကြပါတယ်။
အမျိုးအစား (၂) ဆီးချိုရောဂါ အများစုဟာ လွန်ခဲ့တဲ့ နှစ်အနည်းငယ်အတွင်း အလွန်အကျွံစားပြီး ကိုယ်လက်လှုပ်ရှားမှု မလုံလောက်ခြင်းကြောင့် ဖြစ်ရတာပါ။
ဒီရောဂါအတွက် စမ်းသပ်မှုအနေနဲ့ သိပ္ပံပညာရှင်များဟာ ကျန်းမာသန်စွမ်းတဲ့ လူငယ် ၂၆ ဦးပါတဲ့ အုပ်စုတစ်စုကို တစ်ပတ်ကြာ သူတို့ရဲ့ အလေ့အကျင့်တွေကို ပြင်းထန်စွာပြောင်းလဲဖို့ တောင်းဆိုခဲ့ပါတယ်။ သူတို့အားလုံးဟာ အရင်က လေ့ကျင့်ခန်း ပုံမှန်လုပ်ကြပြီး အဝလွန်ခြင်းမရှိကြသူများ ဖြစ်ပါတယ်။
တစ်အုပ်စုကို တစ်ပတ်ကြာအောင် ပုံမှန်ထက် ၅၀ ရာခိုင်နှုန်း ပိုစားခိုင်းပြီး တစ်နေ့ကို ခြေလှမ်း ၄၀၀၀ အောက်ပဲ လျှောက်ခိုင်းပါတယ်။ သူတို့ရဲ့ အစားအသောက်ကိုတော့ မပြောင်းလဲဘဲ…. ပိုပဲ စားခိုင်းပါတယ်။
ကျန်အုပ်စုတစ်ဝက်ကို ပြေးစက်ပေါ် နေ့စဉ် ၄၅ မိနစ်ခန့် ပြေးခိုင်းပါတယ်။ ပြေးစက်ပေါ်မှာ ပြေးလို့ လောင်ကျွမ်းတဲ့ ကယ်လိုရီတိုင်းအတွက် အစားပိုစားစေပါတယ်။ (ဒီအုပ်စုက ပုံမှန်ထက် ၇၅ ရာခိုင်နှုန်း ပိုစားရပါတယ်) ပါဝင်သူတိုင်း တူညီတဲ့ စွမ်းအင်ပိုလျှံမှု ရှိကြပါတယ်။
လေ့လာမှုမစခင် ကျန်းမာရေး စစ်ဆေးထားပြီး တစ်ပတ်အကြာမှာ ထပ်မံစစ်ဆေးမှု လုပ်ခဲ့ပါတယ်။ ရလဒ်တွေက သိသိသာသာကြီးကို ထူးခြားပါတယ်။
တစ်ပတ်တာ လေ့ကျင့်ခန်းမလုပ်ရဘဲ အစားအသောက်ပဲ ပိုစားရတဲ့အဖွဲ့မှာ သွေးတွင်းသကြားဓာတ်ကို ခန္ဓာကိုယ်က ထိန်းချုပ်မှု သိသိသာသာကျဆင်းသွားတာ တွေ့ခဲ့ရပါတယ်။
တစ်နေ့တစ်ကြိမ် လေ့ကျင့်ခန်းလုပ်တဲ့ အဖွဲ့ကတော့ အင်ဆူလင်ကို ပိုတုံ့ပြန်လာပြီး သွေးတွင်းသကြားဓာတ် ထိန်းညှိခြင်းကိုလည်း မထိခိုက်တာ တွေ့ရပါတယ်။
အားလုံး အစားပိုစား၊ ကိုယ်အလေးချိန် တက်နေပေမယ့် လေ့ကျင့်ခန်းလုပ်ခြင်းဟာ အစားစားများခြင်း၊ လှုပ်ရှားမှုနည်းပါးခြင်းကြောင့် ခန္ဓာကိုယ်မှာဖြစ်ပေါ်လာတဲ့ အပြောင်းအလဲအများစုကို ထိန်းညှိပေးနိုင်တာ တွေ့ရပါတယ်။
ဒီလေ့လာမှုဟာ လေ့ကျင့်ခန်းလုပ်ခြင်းက ကျန်းမာရေးအပေါ် ဘယ်လိုအကျိုးသက်ရောက်မှု ရှိတယ်ဆိုတာ သက်သေပြခဲ့တာပဲ ဖြစ်ပါတယ်။
…
…သွက်လက်တက်ကြွနေဖို့ လေ့ကျင့်ခန်း လုပ်ကြစို့
အမျိုးအစား (၂) ဆီးချိုရောဂါကို စီမံခန့်ခွဲခြင်းနှင့် ကာကွယ်ခြင်းမှာ ကိုယ်လက်လှုပ်ရှားမှုက အဓိကကျ ပေမယ့်၊ ရောဂါရှိသူအများစုက လေ့ကျင့်ခန်းကို ပုံမှန်မလုပ်ကြပါဘူး။ အမှန်တော့ လေ့ကျင့်ခန်းဟာ ကုသမှုအစီအစဉ်ရဲ့ အရေးကြီးတဲ့အစိတ်အပိုင်း ဖြစ်သင့်တာပါ။
ကိုယ်လက်လှုပ်ရှားမှုများ ပုံမှန်လုပ်ခြင်းဟာ သွေးတွင်းသကြားဓာတ် ထိန်းညှိမှုကို တိုးတက်စေပါတယ်။ ခန္ဓာကိုယ်က အင်ဆူလင်ကို ပိုမိုအသုံးပြုနိုင်ပြီး သွေးတွင်းကိုလက်စရောကိုလည်း ထိန်းညှိပေးပါတယ်။
သွေးတွင်းဂလူးကို့စ်ပမာဏကို ကျန်းမာရေးနဲ့ညီညွတ်အောင် ထိန်းထားခြင်းဖြင့် ဆီးချိုနှီးနွယ်အာရုံကြော ရောဂါ၊ ကျောက်ကပ်ရောဂါကဲ့သို့ ရေရှည် နောက်ဆက်တွဲပြဿနာများကို ကာကွယ်နိုင်မှာ ဖြစ်ပါတယ်။
လေ့ကျင့်ခန်းလုပ်ခြင်းဟာ စိတ်ခံစားချက်ကို မြှင့်တင်ပေးပြီး ကိုယ်အလေးချိန်ကို ထိန်းပေးတာမျိုး စတဲ့ အကျိုးကျေးဇူးတွေလည်း အများကြီးရှိပါတယ်။
…
…
အမျိုးအစား ၂ ဆီးချိုရောဂါ ရှိသူများအတွက် အရေးအကြီးဆုံးကတော့ ဆီးချို ထိန်းနိုင်ဖို့ပါ။
ဒါကိုရော လေ့ကျင့်ခန်းက ဘယ်လိုကူညီပေးမလဲ????
အမျိုးအစား ၂ ဆီးချိုရောဂါဟာ သွေးထဲသကြားဓာတ် (ဂလူးကို့စ်) များလွန်းခြင်းကြောင့် ဖြစ်ရပါတယ်။ အဓိကအကြောင်းအရင်းက ခန္ဓာကိုယ်မှာ အင်ဆူလင်ကို ကောင်းစွာအသုံးမပြုခြင်းကြောင့် ဖြစ်စေ၊ အင်ဆူလင်အလုံအလောက် မထုတ်နိုင်ခြင်းကြောင့် ဖြစ်စေ ဆီးချိုဖြစ်လာရပါတယ်။
လေ့ကျင့်ခန်းရဲ့ အကျိုးကျေးဇူးများထဲမှ တစ်ခုကတော့ ဆဲလ်များအပေါ် အင်ဆူလင်ရဲ့ သက်ရောက်မှုကို ပိုမိုထိရောက်စေပါတယ်။
ဆဲလ်များက ဂလူးကို့စ်ကို အသုံးပြုရင် ပိုမိုကောင်းစွာ သုံးနိုင်လာပြီး လေ့ကျင့်ခန်းရလဒ်ကြောင့် အင်ဆူလင်ကို ခန္ဓာကိုယ်က ခုခံစွမ်းလည်း လျော့နည်းလာပါတယ်။
အမျိုးအစား (၂) ဆီးချိုရောဂါရှိသူတွေရဲ့ ၈၀ % ဟာ ရေရှည်နောက်ဆက်တွဲပြဿနာတွေ ဖြစ်လာနိုင်ပါတယ်။ သွေးကြောပိတ်ခြင်းကြောင့် ဖြစ်ရသောနှလုံးရောဂါဟာ တွဲဖက်တွေ့ရတဲ့ ရောဂါတစ်ခုဖြစ်ပါတယ်။
ဒီအတွက် သတင်းကောင်းကတော့ လေ့ကျင့်ခန်းလုပ်ခြင်းက ဒီလိုပြဿနာတွေ ဖြစ်ပွားနိုင်ခြေကို လျော့နည်းစေတယ်ဆိုတာပါပဲ။ ညွှန်ကြားထားတဲ့ ဆေးဝါးအများစုနဲ့ မတူတာက လေ့ကျင့်ခန်းလုပ်ခြင်းဟာ ဘေးထွက်ဆိုးကျိုးမရှိဘဲ ငွေကုန်ကြေးကျလည်း သိပ်မရှိပါဘူး။
…
…လေ့ကျင့်ခန်းမစတင်မီ လုပ်ဆောင်ရန်
အမျိုးအစား (၂) ဆီးချိုရောဂါရှိသူအများစုမှာ အဝလွန်ခြင်းပြဿနာပါ ရှိကြပါတယ်။ အဲဒီတော့ လေ့ကျင့်ခန်း ပုံမှန်စလုပ်ဖို့ ခက်ခဲတတ်ကြပါတယ်။
လေ့ကျင့်ခန်းအစီအစဉ်အသစ် မစတင်ခင် သင့်ဆရာဝန်နဲ့ အရင်ဆုံး ဆွေးနွေးဖို့လိုပါတယ်။ သွေးပေါင်ချိန်ကို စစ်ဆေးဖို့ အရေးကြီးပါတယ်။ ပြီးတော့ ကိုယ်လုပ်နိုင်သလောက်ပဲ ပန်းတိုင်ထားဖို့ မမေ့ပါနဲ့။ ဖြည်းဖြည်းချင်း စတင်ပြီး ကြာချိန်နဲ့ ပြင်းအားကို မြှင့်တင်သွားပါ။
အမျိုးအစား (၂) ဆီးချိုရောဂါ ရှိတယ်လို့ ပြောခံရတာဟာ သင့်ဘဝကို ပြောင်းလဲစေတတ်ပေမယ့် ဒီလိုသေးငယ်တဲ့ ပြောင်းလဲမှုများ နေ့စဉ်လုပ်သွားရင် တိုးတက်မှုတွေ ရလာမှာပါ။
တစ်နေ့တာကို ကိုယ်လက်လှုပ်ရှားမှုများ ထည့်သွင်း ပေါင်းစပ်ခြင်းဟာ ရေရှည်မှာ အကျိုးများစွာ ဖြစ်ထွန်းစေပါတယ်။
…
…ဆီးချိုဆေးသောက်ရင်း လေ့ကျင့်ခန်းလုပ်ရင် ဘာဖြစ်မလဲ
ဆီးချိုမရှိသူဟာ လေ့ကျင့်ခန်းလုပ်နေစဉ်အတွင်း သွေးတွင်းဂလူးကို့စ်နည်းခြင်း (hypoglycemia) ကို ခံစားရလေ့မရှိပါဘူး။ လေ့ကျင့်ခန်းလုပ်ရင်း ခန္ဓာကိုယ်က အင်ဆူလင်ပမာဏကို သဘာဝအတိုင်း လျှော့ချပေးပါတယ်။
တကယ်လို့ သင်ဟာ အင်ဆူလင် (သို့မဟုတ်) sulfonylureas လို ဆေးတွေ သုံးစွဲနေရရင်တော့ ဆီးချိုထိန်းချုပ်တဲ့နေရာမှာ မျှခြေရအောင် ဂရုစိုက်ဖို့လိုပါတယ်။
အစားအစာစားသုံးမှု၊ လှုပ်ရှားမှုတွေနဲ့ ဆေးဝါးများကို အမြဲ စောင့်ကြည့်ပြီး ညှိနေရပါမယ်။
မိမိက ပုံမှန်ထက် လေ့ကျင့်ခန်းပိုလုပ်မိရင် သွေးတွင်းသကြားဓာတ် ကျဆင်းခြင်း ဖြစ်နိုင်ပါတယ်။ တကယ်လို့ ဒီလိုဆေးတွေ ပုံမှန်လည်းသုံးနေ၊ လေ့ကျင့်ခန်းလည်း လုပ်ဖြစ်မယ်ဆိုရင် သတိထားပြီး ချိန်ညှိဖို့ လိုပါတယ်။
အချို့ လေ့ကျင့်ခန်းများလုပ်ရင် မလုပ်မီနဲ့ လုပ်အပြီးမှာ ဆီးချိုဖောက်ကြည့်ဖို့ လိုပါတယ်။
ဖောက်ကြည့်လို့ သင့်သွေးတွင်း သကြားဓာတ်ဟာ ၄ mmol/L အောက် နည်းရင် လေ့ကျင့်ခန်း ဆက်မလုပ်သင့်ပါ။ သကြားပါတဲ့ အစားအစာ၊ သကြားရည် စတာတွေ သောက်ဖို့လိုပါမယ်။
သင့်သွေးတွင်းသကြားဓာတ်ကို စောင့်ကြည့်ပြီး ဘေးကင်းတဲ့ အခြေအနေတစ်ခုကို ပြန်ရောက်အောင် စောင့်ပါ။
ကိုယ်လက်လှုပ်ရှား လုပ်နေတဲ့အချိန်မှာ မိနစ် ၃၀ (သို့) ၆၀ မိနစ်တစ်ခါ ကာဗွန်ဟိုက်ဒရိတ်ပါတဲ့ အစားအစာတွေ စားပေးဖို့ တိုက်တွန်းထားပါတယ်။
အရေးကြီးဆုံးကတော့ လေ့ကျင့်ခန်းကို ခုမှစလုပ်မယ်ဆိုရင် သူ့ကို သင့်ခန္ဓာကိုယ်က ဘယ်လိုတုံ့ပြန်သလဲဆိုတာကို ကြည့်ရှုပြီး ဆေးဝါးတွေနဲ့ပတ်သက်တဲ့ အကြံဉာဏ်တွေပေးဖို့ ဆီးချိုဆရာဝန်နဲ့ အမြဲတိုင်ပင်ဖို့ပါ။
…
…ဘယ်လိုလေ့ကျင့်ခန်းအမျိုးအစား လုပ်သင့်တာလဲ
သင်တကယ်နှစ်သက်တဲ့ လေ့ကျင့်ခန်းနည်းလမ်းကို ရှာဖို့ အရေးကြီးပါတယ်။
လေ့ကျင့်ခန်းလုပ်ရန် class များတက်ခြင်း ဒါမှမဟုတ် အဖော်တစ်ယောက်နဲ့ လမ်းလျှောက်တာ၊ ပြေးတာတွေ လုပ်နိုင်ပါတယ်။ လေ့ကျင့်ခန်းလုပ်ဖို့ အဖော်တစ်ယောက်ရှိခြင်းက မိမိကို ပိုလုပ်ဖြစ်အောင် တွန်းအားပေးပြီး လက်လျှော့ဖို့ အခွင့်အရေးလည်း နည်းပါတယ်။
တစ်ပတ်တာရဲ့ နေ့ရက်အများစုကို ကိုယ်လက် လှုပ်ရှားလုပ်ဖို့ ရည်ရွယ်ထားသင့်ပါတယ်။ အလုပ်ကို လမ်းလျှောက်သွားတာမျိုး၊ ဓာတ်လှေကား မသုံးဘဲ အထက်မြင့်ကို လမ်းလျှောက်တက်တာမျိုးတွေ လေ့ကျင့်သင့်ပါတယ်။
အရင်က ကိုယ်လက်လှုပ်ရှား မလုပ်ဖြစ်တဲ့သူဆိုရင်တော့ ဖြည်းဖြည်းပဲစဖို့ မမေ့ပါနဲ့။ နည်းနည်းနဲ့ ဖြည်းဖြည်းချင်းပဲစပြီး အလေ့အကျင့်ကို ရေရှည်မြဲအောင် မွေးမြူဖို့ ရည်ရွယ်ပါ။
အစားအစာမှ ကယ်လိုရီများကို လျှော့ချခြင်း၊ အစားထိန်းခြင်းကို ကိုယ်လက်လှုပ်ရှားနဲ့ ပေါင်းစပ်ခြင်းက သင့်ကို အကောင်းဆုံးရလဒ်တွေ ပေးပါလိမ့်မယ်။
Strength training လို့ခေါ်တဲ့ ကြွက်သားတင်တဲ့ လေ့ကျင့်ခန်းများကို အေရိုးဗစ်အားကစားနဲ့ ပေါင်းစပ်ခြင်းဟာလည်း အလွန်ကောင်းမွန်ပါတယ်။ ကြွက်သားတွေဟာ သကြားဓာတ်ကို အများဆုံးသုံးတဲ့သူတွေ ဖြစ်တာကြောင့် ကြွက်သားတွေကို သန်မာအောင်လုပ်ဆောင်တဲ့ လေ့ကျင့်ခန်းတွေကို လုပ်ဆောင်သင့်တာပါ။
…
…
ဒါပေမယ့် ဘယ်လိုလေ့ကျင့်ခန်း လုပ်တာပဲဖြစ်ဖြစ် ပုံမှန်လုပ်ဖြစ်ဖို့ကို ဦးစားပေးပါ။ ဒီလိုလုပ်ခြင်းဟာ သင့်ကျန်းမာရေးအပေါ် များစွာမူတည်ကြောင်း သတိရပါ။
တစ်ခါတလေမှာ လေ့ကျင့်ခန်းလုပ်ဖို့ အချိန်မရှိတာ၊ ဆက်လုပ်ချင်စိတ်မရှိတာမျိုး ရှိတတ်ပါတယ်။ အဲ့ဒါတွေကို ရုန်းကန်တွန်းလှန်ပြီး ရေရှည်ဆက်လုပ်ဖြစ်အောင် ကြိုးစားပါ။
ဒီလိုလုပ်ခြင်းအားဖြင့် ကိုယ်အလေးချိန်ပိုတွေကို ကျအောင်ကူညီပေးပြီး ခန္ဓာကိုယ်ရဲ့ အင်ဆူလင် တုံ့ပြန်မှုကိုလည်း ပိုကောင်းအောင် လုပ်ဆောင်ပေးမှာ ဖြစ်ပါတယ်။ ဆီးချိုကို ကောင်းစွာ ထိန်းနိုင်လာပါလိမ့်မယ်။
အထူးကုသမားတော်တစ်ဦး
Telekyanmar
Ref – ????
https:// patient. info /news-and-features/managing-type-2-diabetes-with-exercise
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
????တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
Ministry of Health,
National Unity Government.
