❤️ အစာလည်းဆေး၊ ဆေးလည်းအစာ ❤️ ဆိုတဲ့ စကားလေးအတိုင်း ခုခေတ်မှာ အစားအသောက် ပုံစံမှန်ဖို့ အားပေးလာကြပါတယ်။
အစားအသောက်ပုံမှန် မမှန်ခြင်းကြောင့် အဝလွန်တာ၊ သွေးတိုး၊ ဆီးချို ၊ နှလုံး အစရှိတဲ့ရောဂါတွေလည်း အဖြစ်များလာကြပါတယ်။
ဒါကြောင့် ထမင်းစားတဲ့အခါ အာဟာရမျှတပြီး ကျန်းမာအောင်စားတဲ့ ပုံစံလေးတစ်ခုကို ပြောပြချင်တာပါ…
????️ ဒါကတော့ 50-25-25 Meal ပုံစံပါ။
ဒီ Meal plan က ဆီးချိုသမားအများစုနဲ့ ရင်းနှီးမယ်ထင်ပါတယ်ရှင်….
..
..
အာရှနိုင်ငံအများစုဟာ အများအားဖြင့် ထမင်းကို အဓိကစားတဲ့နိုင်ငံတွေဖြစ်သလို အထူးသဖြင့် မြန်မာပြည်မှာ ကြားရတာအများဆုံးက စည်းကမ်းရှိအောင်ထမင်းစားရင် ဟင်းအများကြီးမစားရဘူး ဆိုတာပါ။ ငယ်ငယ်ထဲက ထမင်းချည့် လှိမ့်စားလာကြရတတ်ပါတယ်။
အိမ်က အဖေအမေ လူကြီးတွေကအစ ဟင်းစားနည်းတဲ့အကျင့်ဟာ အလေ့ကျင့်ကောင်းလို့ မှတ်ကြတာပါ။
အမှန်တော့ ကျန်းမာပြီး အာဟာရမျှတဖို့အတွက်ဆို ထမင်းတစ်ပန်းကန်မှာ ၅၀% က အရွက်၊ ၂၅% က အသား၊ ၂၅% က ထမင်း (သို့) Carbohydrates အပြင် ကျန်းမာတဲ့အဆီ အနည်းငယ်ပါဖို့ လိုအပ်ပါတယ်။
..
..
အသေးစိတ်လေး ထပ်ပြောပေးပါမယ် ရှင်…
.
????၅၀ % အရွက်မှာ သတိထားရမှာက… ကစီဓာတ်တွေပါတဲ့ အသီးအရွက် (Starchy Veggies) က မရပါဘူးနော်…ရွှေဖရုံသီးတို့ အာလူးတို့ပေါ့။
အရွက်ကို ရွေးချယ်တဲ့နေရာမှာ (Non Starchy Veggie) ဖြစ်တဲ့ အစိမ်းရောင်အရွက်… မုန်ညင်း၊ ကန်စွန်း၊ မုန်လာဥ၊ ပန်းဂေါ်ဖီ၊ မှိုအမျိုးမျိုး၊ ငရုတ်ပွ၊ ငရုတ်သီး စတာတွေကို ရွေးချယ်ရပါမယ်။
.
????နောက်ပြီး ၂၅ % အသား နေရာမှာတော့ မိမိတို့ပုံမှန်စားနေကျ … ကြက်၊ ဝက်၊ အမဲသား၊ ငါး၊ ပုဇွန်အပြင် ဥအမျိုးမျိုး၊ တိုဖူး Tofu ၊ ပဲပြား၊ ပဲအမျိုးမျိုး (ကုလားပဲ၊ ပဲနီလေး) တို့ စားလို့ရပါတယ်။ အသားနေရာမှာတော့ အဆီမပါတဲ့ အသားသက်သက်ချည်းပဲက ပိုအဆင်ပြေပါတယ်။
.
????၂၅ % Carbohydrates မှာတော့ … ပထမဆုံးကတော့ ထမင်းပါ။ ပြီးတော့ Starchy Veggie ဖြစ်တဲ့ အာလူး၊ ကန်စွန်းဥ၊ ပြောင်းဖူး စတာတွေလည်း ပါဝင်ပါတယ်။
ဒါအပြင် Oats ၊ ဘာလီစေ့၊ ဂျုံ၊ ဆန်လုံးညို၊ သကြား တို့လည်း Carbohydrates ပါဝင်ပါတယ်။
.
????နောက်ဆုံးတစ်ချက်ဖြစ်တဲ့ အဆီအနေနဲ့ကတော့… ပုံမှန် ဟင်းချက်တဲ့အချိန်မှာ ထည့်သုံးတာဖြစ်တဲ့အတွက် သက်သက်စားရန်မလိုပေမယ့် ကျန်းမာတဲ့အဆီတော့ ရွေးချယ်ဖို့ လိုပါတယ်။
ကျန်းမာတဲ့အဆီဆိုတာ ထောပတ်သီး၊ အခွံမာသီး (Almond၊ သီဟိုလ်စေ့) ၊ သံလွင်ဆီ၊ ပဲဆီ၊ နှမ်းဆီ၊ နေကြာဆီတို့ပဲ ဖြစ်ပါတယ်။
စားအုန်းဆီ၊ အရောဆီ၊ ၀က်ဆီ၊ အမဲဆီတွေက ရှောင်ကိုရှောင်ရပါမယ်။
50-25-25 Meal က ကျန်းမာရေးညီညွတ်သလို ဝိတ်လျှော့ချင်သူ၊ ဆီးချိုရောဂါသည် စသူတွေအတွက်လည်း အထူးသင့်လျော်ပြီး ဒီပုံစံအတိုင်း လူတိုင်းစားပေးနိုင်ရင် အဆင်ပြေပါတယ်။
အသီးအများစု (ပန်းသီး၊ လိမ္မော်သီး၊ စပျစ်သီး၊ ငှက်ပျော်သီး၊ ဖရဲသီး) စတာတွေနဲ့ နို့ထွက်ပစ္စည်းတချို့ဖြစ်တဲ့ နွားနို့၊ ဒိန်ချဉ်၊ ပဲနို့တို့မှာ Carbohydrate အပြင် တခြား ခန္ဓာကိုယ်အတွက် လိုအပ်တဲ့ အာဟာရဓာတ်မျိုးစုံလည်း ပါဝင်နေတာမို့ အလျဥ်းသင့်သလို စားသောက်သင့်ကြောင်းလည်း အကြံပြုပါရစေ ရှင့်။
..
..
ကျွန်မ အတွေ့အကြုံနဲ့ ထည့်ပြောစရာကတော့….
လူနာတွေမေးလာမယ့်… ဘယ်လောက်များများ စားလို့ရမလဲ မေးရင်တော့ လူတစ်ဦးနဲ့တစ်ဦး (အသက်၊ ကျား၊ မ၊ ကိုယ်အလေးချိန်၊ ရောဂါအခံ) စတာတွေအပေါ်မူတည်ပြီး မတူပါဘူး။
အလွယ်ကူဆုံး အကြံပေးရရင်တော့ ကိုယ်စားနေကျ အတိုင်းအတာကိုပဲ 50-25-25 Meal ပုံစံ ပြင်စားပါ။ ကိုယ်ခန္ဓာအလေးချိန် လျှော့ချင်တယ်ဆိုရင်တော့ စားနေကျထက် လျှော့စားပေးလို့ရပါတယ်ရှင်…။
.
Dr Cool
Telekyanmar
Ref – ???? https:// library. teladochealth. com /hc/en-us/articles/360006480894-Your-Balanced-Plate#:~:text=A%20balanced%20plate%20has%2050,of%20a%20balanced%20meal%20plan.&text=Nature’s%20superfoods!,powerful%20nutrients%20that%20reduce%20inflammation.
❤️ NUG, MOH တယ်လီကျန်းမာ ၊ လူတိုင်းအတွက်ပါ ❤️
????တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
( နေ့စဉ်မနက် ၈နာရီမှ ည၁၀နာရီအထိ )
Ministry of Health,
National Unity Government.
