မင်္ဂလာပါ 🥰
ဇန်နဝါရီတစ်လတော့ ကုန်သွားပါပြီ။
ဒီနှစ်မှာ… ငါကျန်းမာမှဖြစ်မယ်၊ ငါပိန်မှရမယ်၊ ငါသွေးတိုးထိန်းနိုင်မှရမယ်၊ ငါဆီးချိုထိန်းနိုင်မှရမယ် စသဖြင့် မိမိကိုယ်မိမိ ရည်စူးထားကြသူတွေ ရှိကြမှာပါ။ ဒီလိုသတ်မှတ်ချက်တွေရော အောင်မြင်ရဲ့လားဆိုတာ ပြန်သုံးသပ်ကြပါစို့နော်။
အရင်ဆုံး မိမိကိုယ်မိမိ သတိထားမိဖို့လိုပါတယ်။ တစ်ခါတလေကျ သိလျက်နဲ့လည်း ရှောင်ပြေးနေမိတာမျိုး ဖြစ်တတ်ပါတယ်။
ဥပမာ၊ သွေးတိုးရှိတယ်ဆိိုပါစို့။ အငန်တွေလျှော့စားရမယ်ဆိုတာလည်း သိတယ်၊ ငါးပိိရည်ရှောင်ရမယ်ဆိုလို့ ရှောင်တယ်၊ သို့ပေသိ အပြင်ကဝယ်စားတာ များနေမိတယ်။ ဆိုင်ဟင်းတွေက အချိုမှု့န်၊ ငံပြာရည် တအားသုံးတာလေ။ နောက်ပြီး အသီးအရွက်များများစားပေးတာ ကောင်းမှန်းသိပေမယ့် မစားဖြစ်နေဘူး စသဖြင့်ပေါ့။
ကျန်းမာရေးနဲ့ညီညွတ်တာတွေက ပြောတော့သာ ကြားကောင်းတာ တကယ်ကျ ရင်ခုန်စရာမကောင်းနေဘူးလေ။ ဒီတော့ ဘယ်လိုလုပ်ရင် ကျန်းမာရေးနဲ့ ညီညွတ်တာတွေ လုပ်မိမလဲဆိုတာ ဆွေးနွေး တင်ပြလိုပါတယ်။
…
…
အရင်ဆုံး မိမိတစ်နေ့တာနိုးတဲ့အချိန်ကနေ အိပ်တဲ့အချိန်ထိ စားဖြစ်တာ အကုန်ချရေးဖို့ပါ။ တစ်လုတ်လောက် မြည်းကြည့်တာပါ အပါနော်။ စားလိုက်တိုင်း နာရီပါတစ်ချက်ကြည့်လိုက်ပြီး အချိန်အလိုက် ချရေးပါ။ မှတ်တာ အသေးစိတ်ဖြစ်ဖို့လိုပါတယ်။ နမူနာပြောရရင် မုန့်ဟင်းခါးဆို အရည်ဘယ်လောက်လောက်၊ မုန့်ဖတ်ဘယ်နှဇွန်း၊ အိုးဘဲဥ ပါ/မပါ၊ အကြော်ပါရင်လည်း ဘယ်နှခု၊ ငံပြာရည် ငြုတ်သီးမှုန့် ထပ်ထည့်ဖြစ်/မဖြစ် စတဲ့ အသေးစိတ်မျိုးပါ။ နိုးတာနဲ့ ဘယ်နှနာရီနိုးတယ်ဆိုတာ ရေးမှတ်တာမျိုး စမှတ်ပါ။ အဲဒီကနေ တစ်ခုခု စားတာနဲ့ ချချရေး၊ အိပ်တော့မယ်ဆိုရင်လည်း အိပ်ချိန်ကို ချရေးပေါ့။ ဒါဆိုရင် မိမိအိပ််ချိန်ကိုပါ ပြန်သုံးသပ်လို့ရမှာပါ။ ဒီဒိုင်ယာရီမှတ်တာက အသေးစိတ်မို့ အစပိုင်းမှာ အလုပ်ပိုသလိုတော့ဖြစ်ပါတယ်။ ဒါပေမယ့့် မိမိရဲ့လက်ရှိမှာ လွဲမှားနေတာက ဘာတွေလဲ၊ သေးသေးလေး ဘာလေးတွေက စပြင်လို့ရမလဲလို့ သုံးသပ်ဖို့ အကောင်းဆုံးကိရိယာပါပဲ။
တစ်ပတ် နှစ်ပတ်လောက် နေ့တိုင်းရေးမှတ်ပြီးတဲ့အခါ မိမိကိုယ်မိမိ ပြန်လည်သုံးသပ်နိုင်ပါပြီ။ ဒီတော့မှ သတိမထားမိဘဲ သွားရည်စာတွေ အများကြီးစားနေမိလို့ ဝိတ်မကျဖြစ်နေတာလား၊ စားတဲ့အစားအစာထဲမှာ ဆိုဒီယမ်များတာတွေ ဖြစ်နေတာလား စသဖြင့် သတိထားမိလာမှာပါ။
…
…
ကဲ ဒီလိုမျိုးမှတ်ထားတာတွေကို သုံးသပ်ဖို့ အလွယ်ဆုံးကနေ စကြည့်ရအောင်နော်…
🔹နံပါတ် (၁)
အိပ်ချိန်နဲ့ မိမိအိပ်ရေးကို သုံးသပ်ခြင်း
တစ်နေ့မှာ အိပ်ချိန် ၈ နာရီလောက် ရှိသင့်ပါတယ်နော်။ အနည်းဆုံး ၆ နာရီလောက်တော့ ရှိပါစေ။ ဒီထက်နည်းရင်တော့ ဦးနှောက်နဲ့ခန္ဓာကိုယ်မှာ အနားမရလို့ အမြန်အိုစေပါတယ်။ ရုပ်တင်မက ကိုယ်တွင်းကလီစာများပါ အရွယ်ရင့်ရော်စေပါတယ်။ နောက်ပိုင်းလေ့လာတွေ့ရှိချက်များအရ ဆီးချိုလို ဇီဝဖြစ်စဉ်ကမောက်ကမဖြစ်တာမျိုးတွေရဲ့ တရားခံထဲ အိပ်ရေးမဝတာပါပါတယ်တဲ့။
ဒါဆိုရင် ပြင်ဆင်ချက်သေးသေးလေးတွေ၊ ရေရှည်လုပ်နိုင်မှာလေးတွေကနေ စကြည့်ရအောင်နော်။
အိပ်ခါနီး ရေမိုးချိုးတတ်သူဆို ရေချိုးအိပ်ပါ။ ဒီတိုင်းအိပ်သူတွေအဖို့တော့ မျက်နာ၊ ခြေလက်ဆေးပြီး ည အပူချိန်နဲ့ သင့်တော်မယ့့် အဝတ်အစားမျိုးလဲပါ။ နေ့ပူညချမ်း တပေါင်းလသရမ်းလိုမျိုးဆို ပူမယ်ထင်ပြီး အပါးလေးဝတ်အိပ််… အရုဏ်တက်ခါနီးလေ ချမ်းလေနဲ့ နှစ်နှစ်ခြိုက်ခြိုက် အိပ်မပျော်တာမျိုး ဖြစ်တတ်ပါတယ်။ ဒါကြောင့် ညကျ ပူမှာလားအေးမှာလား ကြိုတွက်ပြီး စောင်ကိုခြေရင်းထားအိပ်တာမျိုး လုပ်ပါ။ ခြင်တဝှီဝှီနဲ့ဖြစ်မှာစိုးလို့ ခြင်ထောင်နဲ့အိပ်တာအကောင်းဆုံးပါ။ ညမီးမှိန်မှိန် ထွန်းအိပ်ပါ။ မိမိအိပ်ရာကို ၂ ပတ်တစ်ခါလောက်် အခင်း၊ ခေါင်းအုံးစွပ်လဲတာမျ်ိုး ဖုန်ခါသန့်ရှင်းရေးလုပ်တာမျိုး လုပ်ပါ။ ဖုန်းကို အိပ်ရာနားက စားပွဲပေါ်မှာ ထားတာမျိုးလုပ်ပါနော်။
အိပ်ခါနီး ဖုန်းနဲ့ screen ကြည့်တာ အိပ်ရေးထိခိုက်စေပါတယ်။ ကောင်းတာတော့ ၁၂ နာရီအိိပ်မယ်ဆို ၁၀ နာရီလောက်ထဲက do not disturb mode on ပြီး ဖုန်းကိုထားထားလိုက်ပါနော်။ စာဖတ်မယ်ဆိုလည်း night mode နဲ့ဖတ်ပါ။
.
🔹နံပါတ် (၂) ကတော့ မိမိက ဘယ်လိုလူမျိုးဖြစ်ချင်တာလဲလို့ မြင်ယောင်ကြည့်ပါ။
အခု အသက် ၃၀ မိန်းကလေးတစ်ယောက်နေရာက တွေးပြပါမယ်နော်။ ကဲ ငါကတော့ အသက်တွေကြီးလာရင် ဆီးချိုသွေးတိုးတွေ မဖြစ်နေချင်ဘူး။ သွက်သွက်လက်လက် အလုပ်လုပ်နိုင်တဲ့သူပဲ ဖြစ်ချင်တယ်ဆိုရင် ဘယ်လိုပုံစံလေးဖြစ်နေမလဲ မြင်ယောင်ကြည့်လိုက်ပါ။ ဒီလိုမြင်ယောင်လိုက်တဲ့အခါ သိပ်ကို အရွယ်တင် တော်၀င်ဆန်တဲ့ အမျိုးသမီးတစ်ယောက်ကို မြင်ယောင်လာပြီဆိုပါတော့…. ဒါဆိုရင် ငါဖြင့် ကျန်းမာရေးနဲ့ ညီညွတ်တာတွေကို အလေ့အကျင့်မွေးမြူဖို့ အချိန်တန်ပြီလို့ တွေးလိုက်ပါ။
နောက်တစ်ဆင့်ကတော့ ဘယ်ကစရင်ကောာင်းမလဲပေါ့။ ကျန်းမာရေးနဲ့ညီညွတ်တာတွေကတော့ အသီးအရွက်များများစား၊ လေ့ကျင့်ခန်းလုပ်၊ အချိုလျှော့ အငန်လျှော့တွေနဲ့ စုံလို့ပေါ့။
လွယ်မယ့် သေးသေးကနေ စရမယ်ဆိုရင်…
ဥပမာ၊ ဟော့ပေါ့တွေ တအားကြိုက်ပြီး စားနေမိတယ်ဆိုပါစို့နော်။ ဟော့ပေါ့မှာဆိုရင်ဖြင့် ကျောက်သားလို အဖြူစင်းတွေပါနေတာတွေကို မမှာတော့ဘူး။ ပြည့်၀ဆီတွေ များနေတယ်ပေါ့။ နှလုံးသွေးကြော ပိတ်နိုင်တယ်လေနော်။ ဟော့ပေ့ါဆိုင်မှာ အသားသီးသန့့်ဖြစ်တဲ့ အသားတွေကို ပိုစားမယ်၊ အဆီမပါတာကို ရွေးမယ်လို့ စိတ်ကိုစတင်ပြင်ဆင်ကြည့်ပါနော်။ ဒီနေ့ကစပြီး ဟော့ပေါ့မစားတော့ဘူးဆိုတာထက် စားတဲ့အခါတော့ ဘယ်လိုဘယ်ပုံပြင်ဆင်မယ်၊ ဖြည်းဖြည်းချင်းစီ စားမယ် စတဲ့ အများကြီးပြောင်းစရာမလိုတာလေးတွေက စကြည့်ပေါ့နော်။
.
🔹နံပါတ် (၃) ကတော့ ကိုယ့်ကိုယ်ကိုယ် ပိုသတိထာားမိအောင် သတိလုပ်တဲ့အကျင့်လေး မွေးကြည့်ပါ။
တစ်ခုခုစားတော့မယ်ဆိုရင် ငါတကယ်ဗိုက်ဆာလား၊ ငါဒါစားချင်လို့ စားတာလား၊ ရည်ရွယ်ချက်မရှိဘဲ စားတာလားလေး ဖြည့်တွေးကြည့်ပါ။ တစ်ခါတလေကျ စကားပြောရင်းတို့ အလုပ်လုပ်ရင်းတို့ကနေ စားပွဲပေါ်ရှိတာလေးကို လက်က အော်တိုပါးစပ်ထဲထည့်မိတတ်ပါတယ်။ စားချင်လို့ရယ်မဟုတ် ဗိုက်ဆာလို့ရယ်မဟုတ်တာတွေကို မစားဖြစ်အောင် သတိပြုလိုက်တာက ပိုကောင်းပါတယ်။
…
…
ကဲ ဒါဖြင့်ရင် မိမိရဲ့အစားအသောက်ဒိုင်ယာရီပဲပြောပြော၊ နေ့စဥ်မှတ်တမ်းပဲပြောပြော ချရေးကြည့်စို့လားနော်။ ချရေးကြည့်ပြီး မိမိကိုယ်မိမိ version upgrade လုပ်ကြပါစို့နော်။
ရောမမြို့ကြီးက တစ်ရက်တည်းနဲ့ တည်ဆောက်ခဲ့တာမဟုတ်ဘူးဆိုတဲ့ ဆိုရိုးလိုပါပဲ။ သင့်ရဲ့အကောင်းဆုံး ဗားရှင်းကိုလည်း တည်ဆောက်ဖို့ အချိန်ယူဖို့လိုပါတယ်။ အဓိကက ဇွဲလုံလမလျှော့ဘဲ အလေ့ကျင့်ကောင်းလေးတွေ မွေးမြူကြည့်ကြပါစို့နော်….။
အာဟာရဆရာဝန်တစ်ဦး
Telekyanmar
..
..
❤️NUG, MOH တယ်လီကျန်းမာ၊ လူတိုင်းအတွက်ပါ ❤️
👉တယ်လီကျန်းမာတွင် ဆရာဝန်များနှင့် အွန်လိုင်းမှတစ်ဆင့် အခမဲ့ (အခမဲ့) တိုင်ပင်ဆွေးနွေးနိုင်ပါသည်။
*** ပိတ်ရက်မရှိပါ ***
ကြိုတင်ဘိုကင်ယူရန်အတွက် တယ်လီကျန်းမာ messenger ကို ဆက်သွယ်ပါ။
(နေ့စဥ် မနက် ၈ နာရီမှ ည ၁၀ နာရီအထိ)
…
…
👉 စိတ်ပိုင်းဆိုင်ရာ ဆွေးနွေးရင်ဖွင့်လိုသူများအတွက်….
မိမိကိုယ်ကိုသေကြောင်းကြံစည်မှု လုံးဝမရှိစေရ
Zero Suicide Hotline သို့ ဆက်သွယ်ရန်
(မနက် (၈) နာရီမှ နေ့လယ် (၁၂) နာရီ
ညနေ (၆) နာရီမှ ည (၁၀) နာရီအတွင်း)
*** မိနစ်ပိုင်းအတွင်း စာမပြန်ပါက “ /start” ဆိုသည်ကို ထပ်မံနှိပ်ပေးရန် လိုအပ်ပါသည် ***
Ministry of Health,
National Unity Government.
